president.gov.by
Viktar Marcinovič dla budzma.by pra pytańni, jakija vyklikała patajemnaja inaŭhuracyja.
Inaŭhuracyja była prydumanaja ŭ Staražytnym Rymie jak mahičny rytuał, hadańnie aŭhura pa palocie ptušak (zhadajma vypadak z sokałam i pacukom padčas pasiadžeńnia CVK pa rehistracyi kandydataŭ u prezidenty 14.07).
Mienavita prahnoz udzielnika aŭśpicyi pra toje, jakim budzie kiravańnie taho ci inšaha čałavieka, «tranślavała» volu niabiosaŭ i dapamahała paźbiehnuć fatalnych pamyłak.
Paśla taho jak chryścijanstva vycisnuła pahanskija zababony, inaŭhuracyja pieratvaryłasia va ŭračystuju zajaŭku manarcha na tron.
Mienavita hučnaść i razmach tut vyznačali «paśpiachovaść» pracedury. Usie žychary karaleŭstva musili daviedacca i spryčynicca da karanavańnia novaha lidara dziaržavy. I navat kali jany nie byli zaprošanyja, jany musili viedać i rychtavacca da hetaha ŭračystaha dnia.
Padzieju, jakaja adbyłasia siońnia, ź ciažkaściu možna nazvać inaŭhuracyjaj, bo jana nie mieła adnaho z pryncypovych składnikaŭ inaŭhuracyi — hučnaści i adkrytaści.
Jaje nie prosta nie anansavali, jaje datu admaŭlalisia nazvać tady, kali ŭ Pałac užo padciahvalisia zaprošanyja.
Vy ŭžo zaŭvažyli, što jaje, nasupierak zakonu, nie tranślavali pa telebačańni, nie ŭnieśli ŭ sietku prahram?
Ale što bolš važna — na joj nie prysutničali tyja, chto musiŭ prysutničać: usie deputaty Pałaty pradstaŭnikoŭ jak pradstaŭniki naroda (ułada žyvie ŭ tym śviecie, dzie deputataŭ Pałaty pradstaŭnikoŭ sapraŭdy abiraje narod); dypłamaty ŭsich zamiežnych dziaržaŭ — jak padmurak mižnarodnaj lehitymnaści.
Takoj «inaŭhuracyi» nie viedaje historyja, takoha nie adbyvałasia prosta nidzie dahetul.
Bolš za toje, prymietniki «sakretnaja», «patajemnaja» źjaŭlajucca antonimami paniaćcia «inaŭhuracyja».
Heta jak śpieŭ šeptam.
Ci nieruchomy taniec.
Padpolny ŭstup na pasadu vostra stavić šerah pytańniaŭ:
Kali ŭstupleńnie na pasadu adbyvajecca tajemna, dyk i ŭładarańnie musić adbyvacca tajemna, nie?
Što adčuli sotni tysiač «viertykalščykaŭ», jakija praciahvali ŭpeŭnivać siabie, što ŭłada papularnaja, a pratestujuć tolki dźvie-try tysiačy admarozkaŭ? Kali pahroza vuličnych vystupaŭ vymušaje pravodzić maksimalna publičnyja cyrymonii ŭ režymie sakretnaści, jak buduć vykonvacca zakony, dekrety, ukazy? Jakuju siłu jany ciapier majuć? Chto i ŭ jakim statusie ich budzie prymać?
Chto tyja ludzi, što byli ŭ zale? I čamu biełarusy musiać ličyć inaŭhuravanuju asobu svaim prezidentam, a nie kiraŭnikom ludziej, jakim pra tuju padpolnuju inaŭhuracyju jak śled paviedamili?
Niaŭžo ciapier i daradcy prezidenta zychodziać z taho, što pratesty ŭ ahladnaj budučyni nikudy nie źniknuć i situacyja nie zrobicca spakajniešaj?
Chto dakładna heta prydumaŭ, hety farmat? Chto jaho zaćvierdziŭ, praź jakija stadyi vyśpiavańnia prachodziła ideja «partyzanskaj inaŭhuracyi»? Proźviščy datyčnych uvojduć u hanarovuju knihu biełaruskaha supracivu, bo bolšaj padstavy dla kiraŭnika, jaki ličyć, što nabraŭ 80 adsotkaŭ, zrabić było niemahčyma.
Kali vy zasakrecili inaŭhuracyju, ci nie naśpieŭ čas zasakrecić i śpisy čalcoŭ urada, ministraŭ, čynoŭnikaŭ, deputataŭ?
Bo jak niechta naviersie baicca rabić hučny anons svajho ŭračystaha ŭvachodu ŭ kiravańnie krainaj, čamu jahonyja padnačalenyja nie musiać pačać bajacca ŭłasnaj datyčnaści da hetkaj sistemy?
Praviedzienaja jak śled inaŭhuracyja — adzin sa składnikaŭ lehitymnaści. Jakuju lehitymnaść adkryvaje takaja inaŭhuracyja? I čamu i jak taja lehitymnaść moža vychodzić za miežy pakoja, u jakim adbyvaŭsia sakretny rytuał?
Kali Rasija — asnoŭny stratehičny partnior čałavieka, jaki patajemna inaŭhuravaŭsia, čamu pra padziei ŭ Pałacy 23.09 nie viedali navat u Kramli? I što heta kaža pra sapraŭdny ŭzrovień davieru pamiž partniorami?
Jakim čynam prajezd kartežu pa pierakrytym praśpiekcie zamianiaje anansavańnie mierapryjemstva i čamu musić usprymacca jak prajava taho, što padzieja nie była sakretnaj?
ES bačyŭ Łukašenku lehitymnym prezidentam da 5 listapada, času zakančeńnia paŭnamoctvaŭ u minułaj kadencyi. Mienavita ŭ takoj jakaści płanavalisia pieramovy ź im pa pieraadoleńni palityčnaha kryzisu. Najaŭnaść jakoha jaskrava padkreślivajuć akaličnaści inaŭhuracyi. Pryniaćcie paśviedčańnia aznačaje, što papiaredni termin skončany i pačaŭsia novy. Z kim zaraz musić pieramaŭlacca ES?
