Pieršy namieśnik ministra ŭnutranych spraŭ Hienadź Kazakievič pa-raniejšamu nastojvaje, što padčas represij u adnosinach demanstrantaŭ nie było zhvałtavańniaŭ.
«Spačatku ŭ nas byli «zhvałtavańni žančyn» — jany nie paćvierdzilisia. Potym «zhvałtavańni mužčyn», choć pavodle nacyjanalnaha zakanadaŭstva nielha zhvałcić mužčynu, — taksama nie paćvierdzilisia. My pakrokava prychodzim da mierkavańnia, što hetaha nie było. Tym nie mienš u nas tysiačy zvarotaŭ — usie jany buduć pravierany i razhledžany. My nie kažam, što hvałtu nie było ci jon byŭ na 100% abhruntavany, — usio budzie pravierana. Zhvałtavańniaŭ nie było», — zajaviŭ jon.
Što Kazakievič maje na ŭvazie, kažučy «pavodle nacyjanalnaha zakanadaŭstva nielha zhvałcić mužčynu»?
Reč u tym, što ŭ kryminalnym kodeksie asobna isnujuć artykuł 166 «zhvałtavańnie» (u adnosinach da žančyny-achviary) i artykuł 167 «hvałtoŭnyja dziejańni seksualnaha charaktaru» (u adnosinach da mužčyny ci žančyny).
Adkaznaść za ich absalutna adnolkavaja — «chimija» na termin da 4 hadoŭ ci kałonija na termin ad 3 da 7 hadoŭ.
Adnak farmalna heta roznyja składy złačynstva. Tamu kali demanstrant i staŭ achviaraj, to na jurydyčnaj movie heta budzie nazyvacca «hvałtoŭnyja dziejańni seksualnaha charaktaru».
