Stała viadoma, što Anatol Kotaŭ źjechaŭ za miažu, dzie staŭ častkaj Biełaruskaha fondu salidarnaści spartsmienaŭ.
U siaredzinie žniŭnia jon zvolniŭsia z pasady namieśnika zahadčyka adździeła finansavańnia dziaržorhanaŭ Hałoŭnaha finansavaha kiraŭnictva Kiraŭnictva spravami prezidenta.
Čynoŭnik zvolniŭsia ŭ znak niazhody z hvałtam, dziejańniami siłavikoŭ i biaździejańniem dziaržaŭnych orhanaŭ paśla prezidenckich vybaraŭ.
Čytajcie padrabiaźniej: Supracoŭnik Administracyi prezidenta raskazaŭ, čamu zvolniŭsia ŭ znak pratestu
U svoj čas Kotaŭ byŭ hienieralnym sakratarom Nacyjanalnaha alimpijskaha kamiteta, uvachodziŭ u skład dyrekcyi II Jeŭrapiejskich hulniaŭ i paśla žnivieńskaha zvalnieńnia pryznavaŭsia, što chacieŭ by znoŭ źviazać svajo žycca sa spartyŭnaj śfieraj. U vyniku jaho zaprasili dałučycca da Biełaruskaha fondu salidarnaści spartsmienaŭ, dzie taksama ciapier pracujuć žurnalist Maksim Bierazinski i kiraŭnik handbolnaha kłuba «Viciaź» Alaksandr Apiejkin, jaki źbiraŭ podpisy spartsmienaŭ pad listom ab niepryznańni vynikaŭ vybaraŭ. U kamandu ŭvachodziać i inšyja ludzi, ale častka ź ich zastajecca ŭ Biełarusi, tamu ich imiony nie raskryvajucca ŭ metach biaśpieki.
— U miežach fondu my budziem zajmacca akazańniem finansavaj i arhanizacyjnaj padtrymki spartsmienam, jakija tak ci inakš niešta stracili ŭ vyniku taho, što padpisali adkryty list ci zajavili pra svaju hramadzianskuju pazicyju. Naprykład, źvierniecca da nas Alaksandra Ramanoŭskaja, jakuju zvolnili z nacyjanalnaj kamandy, i my joj zmožam dapamahčy finansava ci, naprykład, arhanizavać trenirovačny praces za miažoj. Taja ž situacyja ź inšymi spartsmienami. U pryncypie, zusim chutka my raskažam pra kankretnyja kiejsy dapamohi, čakajcie navin, — raspavioŭ surazmoŭca «Našaj Nivie».
Novaŭtvorany fond isnuje za košt dabračynnych aŭkcyjonaŭ i na achviaravańni biełarusaŭ, u tym liku roznych spartsmienaŭ.
— Heta znoŭ historyja salidarnaści, — kamientuje Anatol Kotaŭ.
Anatol raskazaŭ, što źjechaŭ razam z žonkaj i pierasoŭvajecca pamiž tryma bałtyjskimi stalicami — vymušanaja hieahrafija dla vyrašeńnia rabočych pytańniaŭ.
— Mieniedžar na voli i za kratami — heta absalutna roznyja ŭzroŭni karyści. Kali ŭ nas jość mahčymaść rabić niešta pa-za miežami krainy dla tych, chto pakutuje, znachodziačysia ŭ joj, lepš heta rabić. Nichto nie chacieŭ źjazdžać z radzimy, ale lepš tak, čym nijak. Vierniemsia, jak tolki pieramožam.
