Bieraściejcy i hości horada, što hulali pa piešachodnaj vulicy Savieckaj, napeŭna bačyli i čuli dziaŭčat, jakija ihrajuć na muzyčnych instrumientach. Adna ź ich — Julija Mielichava. Kala siomaj ranicy 1 kastryčnika da jaje dadomu pryjšła milicyja. Jula daviedałasia, što na jaje składzieny pratakoł pa artykule 23.34 KaAP za ŭdzieł u niesankcyjanavanym masavym mierapryjemstvie. Jaje zatrymali, dastavili ŭ Leninski RAUS, potym adpravili da suda ŭ IČU, paviedamlaje «Bresckaja hazieta».
Julija Mielichava ŭ sudzie 6 kastryčnika
Sud nad Julaj pačaŭsia 2 kastryčnika. Zhodna z materyjałami spravy, dniom 27 vieraśnia jana z kvietkami ŭ rukach stajała kala kinateatra «Biełaruś» i brała ŭdzieł u niesankcyjanavanym masavym mierapryjemstvie — tradycyjnaj niadzielnaj akcyi pratestu. Dokazam tamu pa viersii milicyi słužyła videa, źniataje padčas akcyi, a taksama skrynšoty ź jaho.
Sama Jula z samaha pačatku zajaviła, što ŭ akcyi nie ŭdzielničała — pa jaje słovach, dniom jana razam ź siabram chadziła ŭ kino i ŭ kafe na druhim paviersie kinateatra (siabar nie zmoh vystupić śviedkam, bo, pa słovach Mielichavaj, pajechaŭ na pracu za miažu — zaŭv. red.). Jana śćviardžała, što ŭ milicyi abaznalisia: dziaŭčyna, jakuju pryniali za jaje, vyšejšaja rostam, u jaje daŭžejšyja vałasy, a na nahach čorny abutak, tady jak Jula ŭ toj dzień była ŭ biełych krasoŭkach. Akramia taho, tvar dziaŭčyny, jakuju pryniali za Julu, byŭ zasłonieny čornaj maskaj. Padčas pieršaha sudovaha pasiadžeńnia Mielichava zajaviła, što kali ŭ kinateatry jość kamiery videanazirańnia, to zapis ź ich stanie dokazam jaje słoŭ pra toje, što jana była ź siabram u kino.
Sud abviaściŭ pierapynak da 6 kastryčnika, kab za hety čas atrymać zapis z kamiery nazirańnia ŭ kinateatry. Jaho dałučyli da materyjałaŭ spravy. Na kadrach vidać, jak spačatku chłopiec, u jakim Jula apaznała svajho siabra, potym sama Jula zachodziać u budynak kinateatra, a potym razam padymajucca na druhi pavierch.
Śviedkam na pracesie vystupaŭ staršy ŭčastkovy inśpiektar milicyi Siarhiej Bojka. Na sudzie jon patłumačyŭ, što pastupiła infarmacyja pra toje, što Julija Mielichava ŭdzielničała ŭ akcyi pratestu. Kab jaje pravieryć, byli prahledžanyja strymy z akcyi, raźmieščanyja na adnym ź jutub-kanałaŭ, i kadry apieratyŭnaj zdymki.
— Jak adbyvałasia vyśviatleńnie asoby dziaŭčyny, što zafiksavana na skrynšotach? — spytaŭ va ŭčastkovaha sudździa Leninskaha rajona Dźmitryj Kuroŭski.
— Šlacham paraŭnańnia z fatahrafijaj u pašparcie, — adkazaŭ milicyjanier.
Na sudzie jon nastojvaŭ, što dziaŭčyna na videa i skrynšotach — heta Julija Mielichava.
— Čamu vy vyrašyli, što heta ja? — spytała dziaŭčyna va ŭčastkovaha.
— Pa pryčoscy. Tamu što prabor, jaki ŭ vas, vielmi charakterny. I pa vačach, — adkazaŭ Siarhiej Bojka.
Sud spyniŭ razhlad spravy za niedakazanaściu viny Julii Mielichavaj.
Siabry Julii sustreli rašeńnie suda apładysmientami.
