Fielčara lidskaj chutkaj Paŭła Palejčyka zvolnili ŭ lipieni. Nie praciahnuli kantrakt paśla taho, jak na sustrečy ź Cichanoŭskim Pavieł raskazaŭ pra prablemy ŭ balnicy i epidemiju ŭ horadzie. Za toj strym mužčyna jašče i adsiedzieŭ siem sutak. Jak jaho siamja žyvie zaraz?
Fota sa staronki «UKantakcie»
Pavieł pakul pracuje taksistam i vučycca na katehoryju S. «Atrymać pravy nie paškodzić, a tam užo budzie bačna», — kaža jon.
Kidać miedycynu Palejčyk nie choča, ale pracu pa śpiecyjalnaści ŭ rehijonie nie znajšoŭ. Jeździŭ uładkoŭvacca miedbratam u abłasnuju psichanieŭrałahičnuju balnicu «Astroŭla», što pad Lidaj, u Ščučyn na chutkuju, dzie byccam byli patrebny rabotniki. Ale i tam, i tam admovili.
«Ja telefanavaŭ hałoŭnamu doktaru Lidskaj CRB paśla taho, jak u Ščučyn nie ŭziali. Jon skazaŭ: pakul nie ścichnie ŭsio, nie prymu ciabie nazad», — dzielicca fielčar.
Cytuje charaktarystyku, jakuju jamu vydali ŭ balnicy. Aproč taho, što Pavieł zarekamiendavaŭ siabie jak kvalifikavany śpiecyjalist i prymaŭ aktyŭny ŭdzieł u spartovym žyćci kalektyvu, tam jość takija radki:
«Z kiraŭnictvam stancyi chutkaj mieddapamohi nie znachodziŭ uzajemarazumieńnia, kamunikavaŭ na roŭnych, nie zachoŭvaŭ subardynacyju, dazvalaŭ sabie davać acenku prafiesijnym jakaściam asabovych asob, nie karystaŭsia aŭtarytetam bolšaści kaleh, asabistyja kryŭdy vynosiŭ na ŭsieahulnaje abmierkavańnie, schilny da supraćpraŭnych pavodzin».
Jaho žonka dahetul pracuje ŭ toj balnicy na pałovu staŭki reanimatołaham. Cisku na jaje nie było.
Ci źmianiłasia štości ŭ rajonnaj balnicy paśla publičnaha vystupleńnia fielčara?
«Dali dźvie novyja mašyny chutkaj, całkam ukamplektavanyja. Ale heta nie dziaržava, a pryvatnaje pradpryjemstva «Biełteks Optyk». A tak usio adno bardak. Abiacali, što novaje KT pastaviać — u vyniku vyrašyli adramantavać staroje. Pytańnie tolki, jak nadoŭha jaho chopić», — adznačaje Pavieł.
Paśla zvalnieńnia Palejčyka biełarusy sabrali jamu dva hadavyja zarobki za adzin dzień. Pavieł nie čakaŭ takoj padtrymki i zakryŭ kraŭdfandynh užo na druhi dzień.
Častku z tych 20 tysiač rubloŭ siamja pieravodzić na dabračynnaść — na lačeńnie dziaciej i pahašeńnie štrafaŭ lidčukam, zatrymanych na mitynhach.
Padčas pieradvybarčaj kampanii fielčar, darečy, paznajomiŭsia sa Śviatłanaj Cichanoŭskaj. Jamu patelefanavali ź jaje štaba, kali patrebna była dapamoha ŭ Minsku na pikiecie. Pavieł pahadziŭsia pabyć vałancioram na vychodnyja. Kaža, što ź Cichanoŭskaj asabliva nie hutaryŭ, prosta sfatahrafavaŭsia na pamiać.
Paśla vybaraŭ Palejčyk pabyvaŭ u izalatary.
«Heta było 11 žniŭnia. Mianie spynili try mašyny DAI, kali my jechali z žonkaj ź Biarozaŭki ŭ horad. Spyniali, jak bandyta ŭ kino — mašynu całkam abšukali, usio pieraviarnuli. Dali piać sutak.
Mianie nichto nie čapaŭ, ale adzin chłopiec u kamiery byŭ całkam sini. Ja z 11-ha da 13-ha siadzieŭ, a potym nas raptoŭna ŭsich vypuścili. Pazaŭčora chadziŭ pa daviedku ŭ RAUS, tam skazali, što treba, kab ja dasiadzieŭ tyja troje sutak. Tłumaču im: nijak — žonka z kavidam i pnieŭmanijaj doma, budziem na samaizalacyi, na mnie dzieci, vy što. Adpuścili: maŭlaŭ, kali papravišsia, prychodź z rečami».
Paŭła čakaje taksama sud za udzieł u mitynhu 13 vieraśnia.
«U Lidzie jość pratesty, ale stała mienš ludziej vychodzić. Moža, bajacca, — apisvaje abstanoŭku ŭ horadzie fielčar. — U minułuju niadzielu čałaviek 100 sabrałasia, ale ich razahnali, było šmat milicyjanieraŭ. Tym, kaho zatrymali padčas pratestu, dajuć sutki, a kaho pa videafiksacyi vyličyli, zvyčajna štraf».
