2 kastryčnika, u dzień nastaŭnika, stvaralnica viełaruchu ŭ Homieli Śviatłana Karol sa svaimi znajomymi vyrašyli ŭskłaści kvietki da pomnika Irynie Paskievič, jakaja kaliści šmat zrabiła dla raspaŭsiudžvańnia adukacyi ŭ Biełarusi.
Ale praz 10 chvilin paśla sustrečy žančyn da ich pryjechali dva busy amapaŭcaŭ. U raparcie supracoŭnik AMAPa napisaŭ: «Uskładali kvietki biez dazvołu harvykankama da pomnika Suskieviču ŭ adzieńni palityčnaha koleru». Pra zatrymańnie, «palityčnyja kolery» i mifičnaha Suskieviča Śviatłana raspaviała «Našaj Nivie».
Śviatłana Karol ź siabroŭkami kala pomniku Irynie Paskievič
«2 kastryčnika pierad pracaj a 7:30 ranicy my pryjechali da pomnika z kvietkami. U kahości byli astry, u kahości — ružy, chtości chryzantemy ŭziaŭ. Nas było piaciora. Čaćviora z nas — piedahohi, — raskazvaje Śviatłana. —
Infarmacyju pra našu sustreču my nidzie nie raźmiaščali — tolki ŭ našym asabistym čacie vuzkaha koła. U 7:40, praz 10 chvilin paśla sustrečy, my zrabili fatahrafiju la pomnika. I tut ža padjazdžajuć dva mikraaŭtobusy z 10-12 siłavikami ŭ bałakłavach».
Pa słovach Śviatłany, pierad zatrymańniem žančyn siłaviki ŭvažliva ahledzieli susiednija dvary, kab pravieryć, ci niama z kampanijaj jašče kaho. Žančyny sprabavali rastłumačyć, što siońnia dzień nastaŭnika, što jany sami piedahohi i ničoha supraćzakonnaha nie robiać.
«Siłaviki ž paprasili nie raspaviadać nam kazki: skazali, što ŭ nas palityčnaja akcyja i apranutyja my ŭ palityčnyja kolery. My, viadoma, spytali, jakija kolery jany ličać palityčnymi. Adkaz byŭ užo standartny: «Nu vy ž sami ŭsio razumiejecie. Ciapier vy hetyja fotazdymki raźmieścicie va ŭsich apazicyjnych telehram-kanałach».
U vyniku nas usich zatrymali. Mianie zabrali naŭprost z maim rovaram «palityčnaha» koleru: apošnija niekalki miesiacaŭ ja pieramiaščajusia pa horadzie na čyrvonym rovary. I pavieźli nas u centralnaje adździaleńnie milicyi.
Ale pierš čym pieradać nas u ruki rabotnikaŭ adździaleńnia, jany napisali śmiešny rapart: «Uskładali kvietki biez dazvołu harvykankama da pomnika Suskieviču ŭ adzieńni palityčnaha koleru». Chto taki Suskievič, ni my, ni jany nie viedajuć».
Śviatłana ŭspaminaje, što jaje ź siabroŭkami trymali ŭ adździaleńni kala 10 hadzin. Usich žančyn raźviali pa roznych kabinietach. U adnoj ź siabrovak mocna padniaŭsia cisk, jaje pavieźli ŭ balnicu. Bližej da dźviuch hadzin dnia pavieźli jašče adnu — z padazreńniem na mikrainsult. Śviatłana čuła, što da hetaha na siabroŭku mocna kryčali.
«U nas zabrali telefony, jakija da hetaha času nie viarnuli. Da mianie nie puścili advakata i nie dazvolili zajści majoj dačce, jakaja pryviezła mnie žyćciova nieabchodnyja tabletki — u mianie niama ščytavidki, ja invalid treciaj hrupy. Za ŭvieś čas nam na traich dali adzin kubak vady z-pad krana».
Akramia hetaha vypadku, paśla vybaraŭ Śviatłanu zatrymlivali ŭžo dvojčy. Pieršy raz: paśla akcyi kala Čyrvonaha kaścioła — žančynu aštrafavali na 20 bazavych vieličyniaŭ. Druhi: kali išła da syna mima parka Pieramohi, dzie ŭ hety čas było šeście. Śviatłana zrabiła paru fotazdymkaŭ i vykłała ich na fejsbuku. Praz tydzień da jaje pryjechali milicyjanty i zatrymali. U toj raz paśla vychodnych, praviedzienych u izalatary, žančynie dali 30 bazavych.
«Ciapier ja mušu addać dziaržavie 1350 rubloŭ. Pry tym što piensija ŭ mianie 415 rubloŭ. Ale ja ŭsio abskardžvaju, padaju apielacyi».
