Łukašenkaŭski mieha-mitynh, na jaki ŭ Minsk majuć namier zvozić ciahnikami i aŭtobusami biudžetnikaŭ z usioj krainy, zapłanavany na niadzielu na 14.00. Adzin z asnoŭnych punktaŭ zboru — la steły. Zajaŭku na praviadzieńnie mitynhu padała Fiederacyja prafsajuzaŭ.
Mitynh majuć namier pravieści ŭ padtrymku Alaksandra Łukašenki. Płanujecca šeście na płošču Niezaležnaści.
Nakont mitynhu vykazaŭsia kiraŭnik aficyjnych prafsajuzaŭ Orda: «My padali zajaŭku na praviadzieńnie mierapryjemstva i zaprašajem usich žadajučych, chto choča vykazać svaju pazicyju, kamu nieabyjakavy los našaj krainy, pryjści ŭ niadzielu na mierapryjemstva i hetuju pazicyju vyrazna i jasna vykazać, i jaje pakazać. Pa vialikim rachunku, pakazać siońnia, chto ŭ našaj krainie haspadar!»
Nahadajem, raniej z paviedamleńniaŭ čytačoŭ Našaj Nivy stała vidavočna, što ŭłady chočuć pajści va-bank i sabrać u Minsku mieha-mitynh. Padobna na toje, što da rajonaŭ daviedzieny płan pa kolkaści ŭdzielnikaŭ, a kiraŭniki na miescach vykručvajucca, kab jaho vykanać. Jechać nichto asabliva nie rviecca, tamu na niekatorych pradpryjemstvach za pajezdku navat prapanujuć hrošy.
Tak što, mahčyma, na hetych vychadnych paŭtorycca situacyja 16 žniŭnia, kali dva baki «źbiralisia mitynhami». Tady, nahadajem, łukašenkaŭcy źvieźli 15 tysiač čałaviek, a na Marš svabody vyjšła da 300 tysiač.
Fota Nadziei Bužan.
