Student 4 kursa farmfakulteta Viciebskaha mieduniviersiteta Arciom A., jaki pamior 27 kastryčnika ŭ BCHMD, naohuł nie chadziŭ na akcyi pratestu i jaho nichto nie biŭ. Pra heta Tut.by paviedamili jaho maci i siabroŭka. Adnak dakładnuju pryčynu śmierci 20-hadovaha chłopca jaho blizkija pakul nie viedajuć.
— Daktary ničoha peŭnaha nam nie paviedamili. Kali rabili apieracyju, kazali, što, napeŭna, heta traŭma. Potym skazali tolki, što pryčynu śmierci ŭstaluje sudmiedekśpiert — raspaviadaje Natalla, mama Arcioma. — Ale traŭmy niejkaj być nie mahło: syn byŭ doma, na samaizalacyi pa karanavirusie. Karanavirus praciakaŭ u jaho ŭ lohkaj formie, amal nie było tempieratury. Ale Arciom vykonvaŭ usie rekamiendacyi, nikudy nie chadziŭ. A ŭžo na pratestach Arciom dakładna nie byŭ nikoli. Jon byŭ ad hetaha daloki, zajmaŭsia tolki vučobaj.
Maci kaža, što spačatku Arciom skardziŭsia na boli ŭ śpinie, potym — na boli ŭ žyvacie.
— Chutkaja zabrała syna ŭčora ŭ try hadziny dnia, kala vośmaj viečara jamu zrabili apieracyju, u 4.30 ranicy jaho nie stała. Skazali, što adkryŭsia paŭtorny kryvaciok.
Siamja Arcioma žyvie ŭ Hrodnie, rodnyja źbirajucca jechać u Viciebsk pa cieła.
Siabroŭka Arcioma (jaje źviestki jość u redakcyi) — dziaŭčyna i jaje małady čałaviek zdymajuć kvateru sumiesna z Arciomam — raspaviała Tut.by, što chłopiec byŭ na samaizalacyi:
— U Arcioma byŭ «kavid». Dyjahnaz paćvierdziŭsia u piatnicu, 23 kastryčnika. Da hetaha ŭvieś tydzień jon znachodziŭsia na samaizalacyi jak kantakt pieršaha ŭzroŭniu. Nikudy nie chadziŭ, tolki ŭ mahazin, i toje — ź siabram. U niadzielu ŭviečary my vyklikali jamu chutkuju — byli mocnyja boli ŭ śpinie. Žyvot pačaŭ baleć u paniadziełak ranicaj. Arciom tady sam vyklikaŭ doktara na dom, a paźniej užo my vyklikali chutkuju.
Dziaŭčyna śćviardžaje, što Arciom nie ŭdzielničaŭ u pratestach:
— Jon naohuł nie vychodziŭ z kvatery ni ŭ niadzielu, ni ŭ paniadziełak.
Pavodle jaje słoŭ, ni hiematom, ni ran na ciele Arcioma nie było.
— Jon chadziŭ doma biez majki, my b bačyli.
Raniej krynica ŭ BCHMD paviedamiła Tut.by:
- U maładoha čałavieka była šyrokaja zabrušynnaja hiematoma. Takaja traŭma moža adbycca paśla razryvu sasuda. Jamu zrabili apieracyju, krynicu kryvacioku na joj nie ŭstanavili.
Miedyk paćvierdziŭ, što ŭ chłopca byŭ karanavirus. A voś ci moža ŭskładnieńnie kavida ŭ hetym vypadku pryvieści da śmierci chłopca, nie zmoh adkazać:
— Ja b nie skazaŭ, što ad hetaha mahčyma nastolki masiŭny kryvaciok.
