U dačynieńni da 63-hadovaj piensijanierki Aleny Hnauk, jakaja na minułym tydni vyjšła paśla 18 sutak u izalatary časovaha ŭtrymańnia, raspačali kryminalnuju spravu. Pra heta paviedamiła Tut.by jaje dačka Alaksandra. Pa słovach svajakoŭ, piensijanierka prachodzić padazravanaj pa artykule za arhanizacyju i padrychtoŭku dziejańniaŭ, jakija hruba parušajuć hramadski paradak, albo aktyŭny ŭdzieł u ich (342 KK RB).
Što kankretna stavicca ŭ vinu Alenie Piatroŭnie, nieviadoma: jaje advakat ź im jašče nie sustrakaŭsia.
Dačka zatrymanaj Alaksandra ličyć, što padstavaj dla kryminalnaha pieraśledu mahli pasłužyć padziei 13 vieraśnia. U niadzielu demanstranty vadzili karahody na skryžavańni praśpiekta Mašerava i bulvara Kasmanaŭtaŭ. Razhaniali ludziej vadamiotam. Pavodle źviestak na kaniec vieraśnia, pa hetym fakcie było zaviedziena20 kryminalnych spraŭ.
Pa kamientar Tut.by źviarnuŭsia da aficyjnaha pradstaŭnika SK pa Bresckaj vobłaści Dźmitryja Ivaniuka. Na momant publikacyi adkazu ad jaho my tak i nie atrymali.
Zaraz Alena Piatroŭna znoŭ u IČU. Jaje zatrymali ŭ niadzielu, 25 kastryčnika, kala Centralnaha ŭniviermaha. U sieradu jaje čarhovym razam buduć sudzić pavodle art 23.34 KaAP za ŭdzieł u niesankcyjanavanym mierapryjemstvie, paviedamiła TUT.BY Alaksandra.
Alenu Hnauk sudzili ŭžo piać razoŭ. Spačatku jana adbyła 15 sutak aryštu za ŭdzieł u niesankcyjanavanym mierapryjemstvie — niadzielnym maršy 4 kastryčnika. Termin hetaha zaklučeńnia skončyŭsia 19 kastryčnika. Pryčym pakul Alena była ŭ IČU, jaje sudzili jašče dva razy, ale kožny raz spravu adpraŭlali na dapracoŭku.
Paśla aryštu na volu jana nie vyjšła: u toj ža dzień Hnauk sudzili čaćviorty raz — užo za marš 30 žniŭnia. Spravu znoŭ adpravili na dapracoŭku — i adrazu paśla suda Hnauk ŭziali pad vartu jašče raz. 22 kastryčnika, na piatym sudzie, Alenu Piatroŭnu narešcie aštrafavali na 30 bazavych (810 rubloŭ) i adpuścili dadomu.
