Viečaram 28 kastryčnika studentka 4-ha kursa fakulteta dyzajnu Marharyta Šyša nie zmahła zajści ŭ asabisty kabiniet na sajcie ŭniviersiteta. Taksama jana nie znajšła svajho proźvišča ŭ elektronnych žurnałach. Takoje adbyłosia upieršyniu za 4 hady. «Ja nie zrazumieła, što adbyvajecca, - kaža Marharyta. — Ja pamiatała pra vymovy i prafiłaktyčnyja hutarki. Ale toje, što mianie vykinuć adusiul biez papiaredžańnia, stała šokam», piša Hrodna.life.
Ranicaj Marharytu vyklikali ź pieršaj pary i aznajomili z zahadam ab adličeńni, datavanym 27 kastryčnika. Kopiju dakumienta davać nie chacieli. Kali Marharyta admoviłasia padpisvać zahad, dali na ruki vypisku (dakumient jość u redakcyi Hrodna.life). Astatnija dakumienty paabiacali addać zaŭtra.
Marharyta vučyłasia na biudžecie, mieła siaredni bał za minuły siemiestr 9,4 i atrymlivała padvyšanuju stypiendyju. Abranaja śpiecyjalnaść była źviazanaja z dyzajnam adzieńnia. Marharyta niekalki razoŭ udzielničała ŭ konkursach «Mielnica mody», raśpisvała adzieńnie dla siabrovak, rabiła suvieniry i paštoŭki dla studenckich mierapryjemstvaŭ. «Zaraz atrymlivajecca, što takija studenty ŭniviersitetu nie patrebnyja», — kaža jana.
Pryčynaj adličeńnia ŭ vypiscy z zahadu paznačana «sistematyčnaje nievykanańnie abaviazkaŭ navučencam Kodeksa ab adukacyi, parušeńni Praviłaŭ unutranaha rasparadku ŭniviersiteta i Damovy ab padrychtoŭcy śpiecyjalistaŭ z vyšejšaj adukacyjaj za košt biudžetu, a taksama ŭ ździajśnieńni supraćpraŭnych dziejańniaŭ».
Supraćpraŭnymi, pavodle dakładnych zapisak dekana fakulteta paličyli vykanańnie «Kupalinki», «parušeńnie cišyni ŭ čas pierapynku», toje, što studenty chadzili pa ŭniviersitecie ź bieł-čyrvona-biełym ściaham i zrabili zdymki z kartkami «Usio zabaroniena».
Usie «supraćpraŭnyja» dziejańni z udziełam Marharyty adbylisia paśla 9 žniŭnia.
«Što vy tut robicie? Navošta vy siudy pryjšli?» — takija pytańni zadavali studentam, što chacieli vykazać svaju pazicyju. «Pra pieśni i zdymki administracyja chutka daviedałasia. A ŭ adkaz na pytańnie, čamu ŭ niekatorych karpusach univiersiteta niama stałovaj, bufietaŭ ci chacia b aŭtamata z kavaj, kažuć «my nie viedali». 25 hadoŭ korpusu na Tyzienhaŭza, a prarektar Sińko pra heta nie viedaje. Heta jak minimum, dziŭna», — kaža Marharyta.
Zaraz dziaŭčyna kansultujecca z pravaabaroncami ab mahčymaściach abskardžańnia adličeńnia dy inšych varyjantach praciahnuć adukacyju. «Situacyja ciažkaja. Ale, u pryncypie, ja była da takoha hatova. Zaraz samaje ciažkaje — skazać baćkam, što ja bolš nie studentka».
