Biełaruś zakryła miežy ź Litvoj, Polščaj, Ukrainaj i Łatvijaj na ŭjezd. Hramadzianie Biełarusi niejki čas nie mahli viarnucca dadomu. Paźniej hramadzian Biełarusi ŭsio ž pačali puskać.
«Dla mnohich heta było niečakanaściu, u tym liku dla nas. Nichto nie čakaŭ. Nie chvalujciesia, heta nijakaje nie vajennaje stanovišča. Pryčyna ŭ COVID-19. Jaki bok staŭ inicyjataram, nie mahu skazać», — skazali ŭ Dziaržpahrankamitecie Anłajnieru.
Rašeńnie ab zakryćci miežaŭ absalutna niečakanaje, nichto pra jaho nie papiaredžvaŭ. Na pahranpierachodach i kala ich adbyvajucca dramatyčnyja sceny.
Aeraport Minsk nie zakryty, samaloty prylatajuć. U orhanach dziaržkiravańnia razhublenaść: tak, pra zakryćcio miežaŭ z Polščaj, Litvoj, Ukrainaj i Łatvijaj na ŭjezd ničoha nie viedaje MZS.
Na miažy biełarusam abiacali prapuścić ich siońnia paźniej, paviedamlajuć čytačy Našaj Nivy z adnaho z pahranpierachodaŭ. Zamiežnikaŭ — nie.
Na aŭtamabilnych pamiežnych pierachodach panuje poŭny chaos. Miž tym čyhunačnaje i avijazłučeńnie nie pieraryvalisia. Samaloty prybyvajuć u Minsk pa raskładzie, u tym liku z Varšavy.
Paźniej źjaviłasia aficyjnaje tłumačeńnie situacyi na miažy.
«U suviazi z epidemičnaj abstanoŭkaj u sumiežnych krainach Respublika Biełaruś časova abmiažoŭvaje ŭjezd na svaju terytoryju praz naziemnyja punkty propusku asobnych katehoryj fizičnych asob z Łatvii, Litvy, Polščy i Ukrainy», — paviedamlaje Dziaržpahrankamitet Biełarusi.