Piać 17-hadovych studentaŭ staličnaha ŭniviersiteta byli zatrymanyja 27 kastryčnika paśla akcyi salidarnaści sa studentami, jakija strajkujuć u dvoryku BDU pamiž jurfakam i chimfakam. Čaćviora ź ich byli žorstka źbityja siłavikami ŭ milicejskim aŭtobusie, paśla čaho ŭ balnicy ŭsim dyjahnastavali strasieńnie hałaŭnoha mozhu, a niekatorym — čerapna-mazhavyja traŭmy, pierałom nosa i inšyja traŭmy. Na čatyroch studentaŭ u Kastryčnickim RUUSie byli składzienyja pratakoły pa dvuch artykułach KaAP: 23.34 (udzieł u niesankcyjanavanym masavym mierapryjemstvie) i 23.4 (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ). Student i studentka raspaviali pravaabaroncam, jak jany sutyknulisia z žorstkaściu siłavikoŭ.
Jany raspaviadajuć, što studentaŭ, jakija ŭdzielničajuć u akcyi kala BDU, čakali čatyry busy. Čatyry studenty i studentka stajali kala ŭvachodu ŭ handlovy centr «Stalica», kali ŭbačyli, što da ich nakiroŭvajecca supracoŭnik u cyvilnym. Kali jany spuścilisia ŭ pierachod, tam studentaŭ užo čakali supracoŭniki AMAPa. Ich zatrymali na płoščy Niezaležnaści.
«Supracoŭniki pačali viesialicca i ablivać nas vadoj»
«Kali ja bieh, mnie padsiekli nohi i ja ŭpaŭ. Mianie adrazu schapili i panieśli ŭ busik. Pry hetym udaryli dva razy pa tvary, tamu što ja sprabavaŭ padniać hałavu. Mianie zakinuli ŭ aŭtobus, tam užo była maja adnakurśnica. Z nami jechali supracoŭniki, jakim pa hołasie hadoŭ 20. Jany bili mianie ŭvieś čas pa hałavie.
Potym nas pierahruzili ŭ inšy busik. Tam byli ŭžo astatnija chłopcy, ź jakimi my byli kala BDU. Jany potym raspaviali, što ich taksama mocna bili. My ŭsie jechali ležačy adzin na adnym. Na mnie lažali dva čałavieki, choć volnyja miescy tam byli.
Ź mianie sarvali partfiel. Tuzanuli z šlejkami, ciapier partfiel całkam parvany. Sprabavali tam niešta znajści, ale, akramia vady, ničoha nie znajšli. Potym supracoŭniki pačali viesialicca i ablivać nas vadoj.
U hetym busiku nas taksama bili i prynižali. Našamu adnakurśniku raźbili nos. Bolš za ŭsio źbivali chłopca, jaki byŭ u aranžavaj kiepcy. Napeŭna, tamu što jana jarkaja i ŭ vočy kidajecca. My pačuli šmat prynižeńniaŭ i pahroz typu «davajcie ich piarcovym hazam zaljem». Bili kułakami, prynižali nienarmatyŭnaj leksikaj, pałochali turmoj, kazali što pazabivajuć nas.
Kali mianie adpuścili z RUUS, ja pajšoŭ u balnicu, dzie mnie dyjahnastavali strasieńnie mozhu. U mianie mocnych paškodžańniaŭ niama, bo bili ŭ asnoŭnym pa hałavie. Tolki huzak.
Ja da hetaha času nie razumieju, čamu nas zatrymali».
Studentaŭ dastavili ŭ Kastryčnickaje RUUS, ale tam, pa ich słovach, fizičnaj siły ŭžo ŭ adnosinach da ich nie ŭžyvali. Usich studentaŭ adpuścili, na čaćviarych skłali pratakoły ab administracyjnym pravaparušeńni.
Miedycynskaja daviedka adnaho z zatrymanych studentaŭ.
«Skazali, što kali jon zapeckaje kryvioju mašynu, to budzie jaje vylizvać»
17-hadovuju studentku nie źbivali, u adroźnieńnie ad jaje adnakurśnikaŭ. Ale na jaje ŭ Kastryčnickim RUUS byli składzienyja pratakoły pavodle art 23.4 i 23.34 KaAP.
Kroŭ adnakurśnikaŭ na kurtcy studentki paśla taho, jak jany na joj palažali ŭ milicejskim busie.
U niejki momant nas usich kinuli tvaram u padłohu i my lažali ŭsie adzin na adnym. Nam nie dazvalali padymać hałovy, ale adzin AMAPaviec vyciahnuŭ mianie adtul za ruku, pasadziŭ na siadzieńnie pobač z saboj i skazaŭ supakoicca. Nam amal usiu darohu ŭ RUUS kazali, što nas «zakryjuć» i adličać, a jon kazaŭ što ŭsio budzie narmalna.
Kali nas kinuli ŭsich na padłohu, u našaha adnakurśnika pajšła kroŭ z nosa. U jaho ŭsie štany byli ŭ kryvi. Jamu spačatku nie davali vycirać kroŭ. Potym dali jaho ž kapiušon i skazali, što kali jon zapeckaje kryvioju mašynu, to budzie jaje vylizvać».
