Pra heta Alaksandr Łukašenka zajaviŭ siońnia na sustrečy ź mitrapalitam BPC Vienijaminam.
«Pry ŭsich padziejach, jakija adbyvalisia i adbyvajucca, asabliva ŭ Minsku, nam udajecca hety kanfiesijny mir zachavać. Viadoma, nie biez pamyłak i z boku ŭładaŭ, i z boku našych kanfiesij. Ale chaču, kab vy mianie razumieli i pačuli inšyja, kali choć adna arhanizacyja ŭ Biełarusi, budź to hramadskaja ci relihijnaja, budzie nakiravana na razbureńnie dziaržavy, ja, viadoma, jak kiraŭnik dziaržavy pa Kanstytucyi abaviazany abaraniać hetu dziaržavu, heta moj najpieršy abaviazak. Viadoma, ja budu vymušany reahavać», — zajaviŭ Łukašenka.
Jon pryvioŭ u prykład kiraŭnika katalickaj carkvy ŭ Biełarusi Tadevuša Kandrusieviča.
«Jeździć u Polšču i atrymlivać kansultacyi, jak razburać našu krainu nikomu nie budzie dazvolena», — skazaŭ Łukašenka.
Nahadajem, što kiraŭnika katalickaj carkvy Biełarusi Tadevuša Kandrusieviča 31 žniŭnia biez tłumačeńnia pryčyn nie ŭpuścili ŭ Biełaruś z Polščy. Paźniej Łukašenka prakamientavaŭ situacyju, zajaviŭšy, što katalicki ijerarch vyjechaŭ z našaj krainy dla kansultacyj u Varšavu i, atrymaŭšy peŭnyja zadačy, viartaŭsia ŭ Biełaruś i trapiŭ u śpis nieŭjaznych, jaki źjaŭlajecca ahulnym dla Biełarusi i Rasii. Jon taksama paviedamiŭ, što źjaviłasia infarmacyja ab najaŭnaści ŭ Kandrusieviča, akramia biełaruskaha, hramadzianstva inšaj krainy.
U siaredzinie vieraśnia stała viadoma: farmalnaj pryčynaj stała toje, što pašpart katalickaha ijerarcha pryznali niesapraŭdnym.
Taksama siońnia Łukašenka vykazaŭsia pra niedachop śviataroŭ u Biełarusi, piša BiełTA.
«My pabudavali niamała prychodaŭ, i ŭ nas časam nie chapaje śviataroŭ. I nie tolki ŭ vas. Ale pravasłaŭnaja carkva z-za miažy, z čužych nam krain nie viazie śviataroŭ, jak heta adbyvajecca ŭ niekatorych kanfiesijach. I ja Papu Rymskamu (i raniejšamu, i ciapierašniamu) paznačyŭ hetuju temu. Jak my možam prymać ciapier śviataroŭ z Polščy, kali polskaja dziaržava, čysta katalickaja, zaniała takuju pazicyju ŭ dačynieńni da Biełarusi? Heta nienarmalna», — zajaviŭ Alaksandr Łukašenka.
Jon ličyć, što ŭ Biełarusi treba «bolš intensiŭna rychtavać svaich katalickich śviataroŭ». Hetaje pytańnie, pavodle jaho słoŭ, było pastaŭlenaje jašče pierad Papam Rymskim Bieniedyktam XVI. «My budziem na hetym nastojvać», — padkreśliŭ Łukašenka.
