Jak stała viadoma Tut.by, śledčyja Pieršamajskaha rajona Minska raspačali kryminalnuju spravu pa art. 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak). Mnohija z tych, chto byŭ zatrymany ŭčora, ciapier padazravanyja pa hetym artykule.
Paśla zatrymańniaŭ padčas niadzielnaha maršu stała źjaŭlacca infarmacyja, što razam z abvinavačvańniem pavodle ŭžo zvykłaha artykuła 23.34 KaAP, ludziej taksama pryznajuć padazravanymi pavodle art. 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak). I havorka idzie nie ab adzinkavych vypadkach, pa niepaćvierdžanaj infarmacyi, tolki ŭčora niekalki dziasiatkaŭ čałaviek atrymali taki status. Siońnia hetaja ličba moža pavialičycca.
Jak udałosia daviedacca Tut.by, zatrymanych padčas niadzielnaha maršu dastaŭlali ŭ Pieršamajskaje, Frunzienskaje RUUS, dalej paviedamlali pra art. 342 KK i paśla dopytu adpraŭlali ŭ Žodzina abo na Akreścina. Ale takaja schiema, kažuć, pracavała i ŭ inšych adździaleńniach milicyi.
— Muža pa administracyjnaj spravie zatrymali ŭ niadzielu ŭ rajonie vulicy Siadych, ale śledčy ŭ RUUS dapytvaŭ užo pa kryminalnaj spravie, — raspaviadaje minčanka Maryna. — Ciapier muž padazravany pa art. 342 KK, jaho pavieźli ŭ Žodzina. Śledčy skazaŭ advakatu, što mnohija zatrymanyja prachodziać padazravanymi pa kryminalnaj spravie.
Adzin sa staličnych advakataŭ paćviardžaje Tut.by: paśla ŭčorašniaj akcyi jahony klijent taksama staŭ padazravanym pavodle art. 342 KK, jaho pavieźli ŭ Žodzina. U inšaha abaroncy dvoje zatrymanych prachodziać pa kryminalnaj spravie. Kamientujučy infarmacyju ab niekalkich dziasiatkach padazravanych, advakat adznačaje, što heta «całkam mahčyma».
— Ciapier u jurydyčnyja kansultacyi pastupajuć masavyja zajaŭki na ŭdzieł advakata ŭ spravach pavodle art. 342 KK, — adznačaje abaronca. — Toje, što było ŭčora, niejkaje nou-chau, bo papiarednija niadzielnyja maršy ničym nie adroźnivalisia ad hetaha. Pieršamajski RASK Minska raspačaŭ kryminalnuju spravu ŭ dačynieńni da nieŭstanoŭlenaj asoby, ja tak razumieju, zatrymanych buduć pryznavać padazravanymi.
Čamu spravu zaviali śledčyja Pieršamajskaha rajona, tłumačycca tym, što marš 1 listapada prachodziŭ u asnoŭnym na terytoryi mienavita hetaha rajona. Dalej uźnikaje pytańnie: paśla suda pa administracyjnaj spravie adpuściać ci hetych ludziej dadomu abo jany zastanucca za kratami ŭ ramkach artykuła. Sankcyja artykuła praduhledžvaje pakarańnie ad štrafu da troch hadoŭ pazbaŭleńnia voli.
Pa paviedamleńni «Biełsata», padazravanymi pa kryminalnaj spravie taksama stali žurnalisty Źmicier Bujanaŭ, Dźmitryj Kraŭčuk i Arciom Bahasłaŭski.
Paźniej SK paviedamiŭ, što 231 čałaviek pryznany padazravanym pa spravie ab masavych biesparadkach 1 listapada.
«Pavodle źviestak śledstva, 1 listapada na terytoryi stalicy prajšli niesankcyjanavanyja masavyja mierapryjemstvy, padčas jakich zatrymanyja niekalki socień hramadzian, jakija hruba parušyli hramadski paradak. Ich dziejańni byli spałučanyja ź vidavočnym niepadparadkavańniem patrabavańniam pradstaŭnikoŭ ułady i paciahnuli parušeńnie pracy transpartu i arhanizacyj. Taksama paškodžanyja abjekty haradskoj infrastruktury i aŭtamabil orhanaŭ unutranych spraŭ.
Zaviedziena kryminalnaja sprava pa fakcie arhanizacyi dziejańniaŭ, jakija hruba parušajuć hramadski paradak, i aktyŭnaha ŭdziełu ŭ ich pa č. 1 art. Padazravanym pa spravie pryznany 231 čałaviek, jany dapytanyja pra abstaviny ździajśnieńnia supraćpraŭnych dziejańniaŭ.
Pravodziacca śledčyja dziejańni i apieratyŭna-vyšukovyja mierapryjemstvy, nakiravanyja na ŭstanaŭleńnie inšych asob, jakija majuć dačynieńnie da supraćpraŭnaj dziejnaści», — havorycca ŭ paviedamleńni.
