Siarhiej Masłoŭski słužbu ŭ milicyi skančaŭ na pasadzie načalnika DAI Minskaj vobłaści. 11 kastryčnika jaho zatrymali za ŭdzieł u niadzielnym maršy. Jak vyśvietlili rodnyja, da jaho z samaha pačatku było «asablivaje» staŭleńnie, pakolki Masłoŭski adrazu skazaŭ, što jon były milicyjant. Jamu dali 15 sutak aryštu, na nastupny dzień paśla suda jon na chutkaj trapiŭ u špital z padazreńniem na insult, udarami i hiematomami. Pa zakančeńni aryštu na volu nie vyjšaŭ, jaho zatrymali znoŭ, užo za niepadparadkavańnie ŭčastkovamu, i taja ž sudździa «vypisała» jašče 15 sutak. Siarhiej paśpieŭ skazać u sudzie, što bolš za dva tydni jaho trymali ŭ karcary ŭ žudasnych umovach, siamja rychtuje skarhu ŭ Kamitet suprać katavańniaŭ AAN, piša TUT.BY.
Siarhiej Masłoŭski (źleva) i Aleh Voŭčak
Siarhieju Masłoŭskamu 56 hadoŭ, pałkoŭnik u adstaŭcy, doŭhi čas słužyŭ u apieratyŭna-pošukavym adździele UUS Minabłvykankama, skončyŭ słužbu na pasadzie načalnika DAI Minskaj vobłaści, piensijanier.
— U baćki byli šmatlikija miedali i nahrudnyja znaki za dasiahnieńni ŭ słužbie, u tym liku padpisanyja Karajevym i Łukašenkam, — raspaviadaje dačka Volha. — Navat nie znachodziačysia na słužbie, jon staraŭsia vykanać hramadzianski abaviazak: adnojčy, spyniajučy vuličnuju bojku, atrymaŭ pierałom nosa, a ŭ 2011 hodzie, užo paśla vychadu na piensiju, zaŭvažyŭ na aŭtarynku rabaŭnika, zdoleŭ spynić jaho i viarnuć paciarpiełamu hrošy. Padčas słužby jon zaŭsiody kiravaŭsia zahadam MUS «ab vietlivym i ŭvažlivym staŭleńni supracoŭnikaŭ orhanaŭ unutranych spraŭ i vajskoŭcaŭ unutranych vojskaŭ da hramadzian», źmiest jakoha patrabavałasia viedać na pamiać. Toje, što robicca ciapier, z hetym zahadam zusim niesupastaŭlalna.
11 kastryčnika Siarhieja Masłoŭskaha zatrymali. Pavodle materyjałaŭ administracyjnaj spravy, adbyłosia heta ŭ rajonie haścinicy «Płanieta» ŭ 15:40. Jak pakaža śviedka-milicyjant Bielski N. A., Masłoŭski ŭziaŭ udzieł u šeści hrupy ludziej, paznačanych bieł-čyrvona-biełaj simvolikaj, i vykrykvaŭ «Žyvie Biełaruś!».
— Vidavočcy raspaviali, što da jaho adrazu było «asablivaje» staŭleńnie, tamu što jon skazaŭ, što słužyŭ u milicyi, — kaža Volha. — Nieŭzabavie jon trapiŭ u špital z padazreńniem na insult.
14 kastryčnika adbyŭsia sud, na jakim Siarhiej Masłoŭski zajaviŭ, što sapraŭdy ŭdzielničaŭ u šeści, ale łozunhi nie vykrykvaŭ. Raniej da administracyjnaj adkaznaści były milicyjant nie pryciahvaŭsia, jak paznačana ŭ pastanovie suda, adnak jamu adrazu ž dali maksimalna mahčymaje pakarańnie (pa č. 1 art. 23. 34 Kaap) — 15 sutak aryštu. Spravu razhladała sudździa Savieckaha suda Maryna Fiodarava.
A ŭžo na nastupny dzień Masłoŭskaha na chutkaj pryvieźli ŭ špital MUS (tut akazvajuć miedyčnuju dapamohu nie tolki dziejnym, ale i byłym milicyjantam). Rodnych da jaho nie puścili, patłumačyŭšy heta niespryjalnym epidemijałahičnym stanoviščam. I dasłali adkaz na zvarot ab stanie zdaroŭja.
Jak pakazana ŭ dakumiencie za podpisam namieśnika hałoŭnaha lekara Aleny Bahrovaj, Masłoŭski byŭ dastaŭleny ŭ špital pa ekstrannych pakazańniach bryhadaj chutkaj dapamohi, z padazreńniem na insult, byli i inšyja dyjahnazy pad pytańniem. U vyniku abśledavańnia dyjahnastavali arteryjalnuju hipiertenziju III-j stadyi (samaja vysokaja, cisk bolš za 180/bolš za 110) ryzyka 4 (samaja vysokaja), kryzavaje ciačeńnie i šerah inšych zachvorvańniaŭ. Taksama adznačana, što ŭ pacyjenta vyjaŭleny «ŭdary, hiematomy abiedźviuch ściohnaŭ, ranki ŭ vobłaści abodvuch pramianiovazapiaścievych sustavaŭ, jakija nie ŭpłyvali na ahulny stan pacyjenta».
U materyjałach administracyjnaj spravy nie ŭkazvajecca, što Masłoŭski akazaŭ supraciŭ pry zatrymańni i što da jaho ŭžyvałasia fizičnaja siła i śpiecyjalnyja srodki ŭ adpaviednaści z zakonam «Ab orhanach unutranych spraŭ». Pry hetym namieśnik hałoŭnaha doktara ŭkazała, što Masłoŭski paviedamiŭ lekaru-chirurhu, što «11 kastryčnika byŭ źbity nieviadomymi asobami ŭ maskach».
«Rasśledavańni pryčyn i miechanizm atrymańnia traŭmaŭ nie ŭvachodzić u zadačy špitala», — ukazvaje ŭ adkazie Bahrova.
Pa zakonie, pry zvarocie (dastaŭcy) u balnicu pacyjentaŭ z traŭmami kryminalnaha (hvałtoŭnaha) charaktaru supracoŭniki pryjomnaha pakoja abaviazany infarmavać pra heta orhany ŭnutranych spraŭ. Ci zrabili heta ŭ špitali MUS, vyśvietlić nie ŭdałosia: u pryjomnaj admovilisia źviazać žurnalista z hałoŭnym lekaram.
— U nas była nadzieja, što z ulikam stanu zdaroŭja baćki jaho paśla balnicy adpuściać dadomu, ale praz try dni jaho viarnuli ŭ izalatar dasiedžvać «sutki», — raspaviadaje Volha. — Advakata da jaho nie puścili. Jak my vyśvietlili paźniej, baćku ŭtrymlivali ŭ žudasnych umovach u karcary. Pieradačy z adzieńniem i praduktami, jakija ŭ nas prymali, jamu ŭ vyniku nie addali.
26 kastryčnika rodnyja zahadzia, u 14:00, pryjechali da IČU na Akreścina, kab sustreć Siarhieja. Adnak u 15:40, jak mierkavałasia, jon na svabodu nie vyjšaŭ.
— Prykładna ŭ 16:20 nam skazali, što jon znachodzicca ŭ Savieckim RUUS, — uspaminaje Volha. — My pajechali tudy, nam paćvierdzili, što jon u ich, i skazali, što paśla RUUS jon znoŭ pajedzie na Akreścina.
U materyjałach užo druhoj administracyjnaj spravy paznačana, što 26 kastryčnika ŭčastkovy milicyjant Savieckaha RUUS Tycyk A. I. zatrymaŭ Siarhieja Masłoŭskaha «dla vyśviatleńnia asoby» ŭ 15:50 pa adrasie zavułak Jakuba Kołasa, 9. Ale pakolki Masłoŭski ŭpiraŭsia, chapaŭsia za formiennaje abmundziravańnie i admaŭlaŭsia sieści ŭ słužbovy aŭtamabil, kab prajści ŭ milicyju, jaho zatrymali za niepadparadkavańnie (Savieckaje RUUS znachodzicca za 400 mietraŭ ad miesca zatrymańnia (zavułak Jakuba Kołasa, 3). Jak Siarhiej Masłoŭski apynuŭsia na zavułku Kołasa ŭ 15:50, kali pa dakumientach jaho pavinny byli adpuścić z Akreścina 15:40, zastałosia zahadkaj, adlehłaść pamiž hetymi abjektami — amal 10 km.
Sam Masłoŭski ŭ sudzie skazaŭ, što byŭ u IČU, niepadparadkavańnia supracoŭnikam milicyi nie akazvaŭ. Pakazańni suprać jaho daŭ toj ža śviedka Bielski N. A., jaki vystupaŭ i na pieršym pracesie, kali pałkoŭnika sudzili za akcyju. I praces viała ŭsio taja ž sudździa suda Savieckaha rajona Maryna Fiodarava, jakaja znoŭ «vypisała» maksimalnaje pakarańnie — 15 sutak aryštu.
— Na druhim sudzie jon paśpieŭ skazać, što 15 dzion jaho trymali ŭ karcary ŭ žudasnych umovach, sudździa ŭsio heta čuła. I tolki niadaŭna (druhi sud adbyŭsia 28 kastryčnika, pa pieršaj spravie byŭ zatrymany 11 kastryčnika — zaŭv. TUT.BY) jaho pieraviali ŭ zvyčajnuju kamieru, — kaža dačka Masłoŭskaha. — My ličym, što ŭtrymańnie ŭ karcary pryviało da paharšeńnia jaho zdaroŭja.
Baćka dahetul znachodzicca ŭ izalatary, advakata da jaho pa-raniejšamu nie dapuskajuć. Ciažka padabrać słovy, kab apisać strach i biezdapamožnaść ad taho, što pavažany ŭ hramadstvie čałaviek u adzin momant, na dumku niekatorych dziaržsłužačych, moža stać niepažadanym i atrymać da siabie adpaviednaje staŭleńnie z boku ŭłady.
