«Pa danych śledstva, unačy 4 listapada nieviadomyja zajšli ŭ padjezd doma pa vulicy Bieruta ŭ Minsku i padpalili ŭvachodnyja dźviery adnoj z kvater. Paśla čaho, vyjšaŭšy na vulicu, jany zakinuli niekalki butelek z zapalnaj sumieśsiu na bałkon hetaj ža kvatery i ŭciakli ź miesca zdareńnia», — paviedamiŭ Śledčy kamitet.
«40-hadovy mužčyna, jaki byŭ u kvatery, vyklikaŭ MNS i pačaŭ tušyć uzharańnie. U vyniku zdareńnia paškodžany bałkon kvatery i ŭvachodnyja dźviery».
Naturalna, źjavilisia čutki, što kvatera mahła naležać kamuści z rabotnikaŭ siłavych struktur. Ale susiedzi kažuć, što heta małavierahodna.
«Raniej žyła tam pažyłaja žančyna. Pamierła, paśla kvateru zdavali. Ciapier tam žyli niejkija ludzi, vielmi padobnyja na prablemnuju siamju, — kažuć susiedzi. — Jany zdymajuć hetuju kvateru mienš za miesiac, ale pjuć, tamu asabliva kamunikavać ź imi žadańnia ni ŭ kaho niama».
Susiedzi kažuć, što žychary paškodžanaj kvatery ŭ formie nie chadzili.
«Chadzili čutki pra toje, što ŭ kvatery milicyjaniery, ale hetyja žychary tak pili… Nie dumaju, što jany rabotniki milicyi», — kaža susiedka.
Paśla padpału zatrymali piaciarych padazravanych, zaviali spravu pa artykule «asabliva złosnaje chulihanstva». Pakarańnie — ad 3 da 10 hadoŭ.
Paźniej milicyja ahučyła padrabiaznaści.
«Vyśvietliłasia, što napiaredadni kampanija piła harełku. Padčas zastolla adzin z udzielnikaŭ raspavioŭ ab svaim kanflikcie z mužčynam z susiedniaha doma i prapanavaŭ jamu adpomścić, — paviedamlaje pres-słužba MUS. —
Sa słoŭ zatrymanych, jany kupili na zapraŭcy niekalki litraŭ bienzinu, raźlili jaho ŭ butelki z-pad vina i nakiravalisia da kryŭdziciela. «Snarady» byli zakinutyja na bałkon kvatery i vykarystany dla padpału ŭvachodnych dźviarej».
Usie fihuranty biespracoŭnyja i nieadnarazova sudzimyja mužčyny va ŭzroście ad 35 da 40 hadoŭ.
