U infiekcyjnych addzialeńniach paliklinik u mnohich haradach stajać daŭžeznyja čerhi. Pad kavidnych chvorych addali vialikuju častku balnic. Pa ŭsim vidać, što situacyja vielmi tryvožnaja.
Za krasavik—červień śmiarotnaść u Biełarusi pieravysiła pakazčyki minułych hadoŭ na 5500 čałaviek, choć aficyjna za toj pieryjad ad Covid-19 u krainie pamierła tolki 398 čałaviek. Chaj heta budzie vam napaminam pra toje, jak važna pieraścierahacca ciapier, kali situacyja, miarkujučy pa ŭsim, horšaja, čym u viesnavuju chvalu.
Nahadvajem asnoŭnyja praviły i toje, što navuka viedaje pra karanavirus na siońnia.
1. Nasicie masku ŭ hramadskim transparcie, kramie, na pošcie, u lubym zakrytym pamiaškańni. Nadziavajcie masku i pry razmovie z čužym čałaviekam na dvare.
2. Minimizujcie znachodžańnie ŭ transparcie i inšych zakrytych pamiaškańniach.
3. Stroha vytrymlivajcie jak minimum 10 dzion samaizalacyi, kali vy pieršy kantakt.
4. Simptomy kavidu roznyja ŭ roznych ludziej. U 4-ch čałaviek z 10-ci prapadaje niuch.
U astatnich nie prapadaje. Časty simptom — kašal, ale nie va ŭsich. U niekaha balić hałava, u niekaha — skura. U mnohich zakładvaje nos, ale pa-asablivamu — biez čychańnia.
Časta kavid supravadžajecca słabaściu.
Dyjahnastavańnie ŭskładniajecca i tym, što testy, jakija vykarystoŭvajucca ŭ Biełarusi, zbojnyja. My nie raz sutykalisia z historyjami, kali muž i žonka majuć adnolkavyja simptomy, ale vynik testaŭ u ich — rozny.
5. Kavidnyja pnieŭmanii raźvivajucca prykładna ŭ 15% infikavanych. Pamiraje ad kavidu tolki 0,55% infikavanych.
Heta ŭ razy i razy bolš, čym ad hrypu, ale heta daloka nie čuma. I ŭsio ž budźcie adkaznymi. Starejšyja, słabiejšyja ludzi — u hrupie ryzyki, vy možacie prynieści infiekcyju niekamu ź ich. I inšaje — tyja 15—20%, jakija pieranosiać chvarobu ciažka, mohuć doŭhi čas pakutavać ad zapaleńnia lohkich, hałaŭnych bolaŭ, słabaści.
6. Padstava dla tryvohi — ciažki kašal, zadyška, boli ŭ hrudziach, krajniaja słabaść.
7. Źviartajciesia, prabivajciesia da daktaroŭ. Formy praciakańnia kavidu na siońnia ŭžo dastatkova vyvučanyja, schiemy lačeńnia pravieranyja, daktary viedajuć svaju spravu i robiać usio, što mohuć.
8. Kali vy chvarejecie ŭ ciažkaj formie, vas špitalizujuć, i daktary vyznačać schiemu lačeńnia.
9. Kali vy chvarejecie ŭ miakkaj ci siaredniaj formie, hałoŭnych praviłaŭ try. Abmiažujcie aktyŭnaść, nakolki heta mahčyma. Jak i pry inšych virusnych chvarobach, adpačyvajcie i picie šmat vadkaści (jana vyvodzić taksiny). Starajciesia bolš lažać, lepš u pryŭźniataj pazicyi.
10. Pamiatajcie, što bieśsimptomnyja nośbity kavidu taksama pieradajuć zarazu, i tak možna naškodzić druhim ludziam.
Praviła našeńnia maski, abmiežavańnia blizkich kantaktaŭ raspaŭsiudžvajecca na vas, navat kali vy małady i zdarovy.
11. Nadziejnyja vakcyny ad Covid-19 — na padychodzie. Možna mierkavać, što ŭ siaredzinie nastupnaha hoda vakcynacyja stanie masavaj.
Čytajcie taksama: Pamierła 30-hadovaja rabotnica dziciačaha sadka ź Mikaševičaŭ. Raskazvajuć muž i śviakroŭ
