Volha Chižynkova. Fota Nadziei Bužan
«Mis Biełaruś — 2008», eks-pres-sakratarku bresckaha «Dynama» Volhu Chižynkovu pakarali 12 sutkami aryštu, piša Tut.by
Volhu zatrymali 8 listapada padčas Maršu pratestu ŭ Minsku. Troje sutak jana praviała na Akreścina. Siońnia prajšoŭ sud.
U sudzie Volha vinu nie pryznała. Jana raspaviała, što 8 listapada išła z kvietkami vinšavać siabroŭku. U pieršy raz jaje tłumačeńnie siłaviki pryniali, druhi raz — u rajonie Kafiedralnaha sabora — užo nie, i zabrali. Heta było prykładna ŭ 15.00 (u pratakole paznačany čas 15.10−15.30).
Pa jaje słovach, nijakaha šeścia abo vialikaj kolkaści ludziej u miescy zatrymańnia nie było — usio jak u zvyčajny dzień. Nijakich łozunhaŭ jana taksama nie vykrykvała.
U aŭtazaku, pa jaje słovach, raspylili haz, choć jechali tolki dziaŭčaty i nichto nie supraciŭlaŭsia.
Dalej u sudzie vystupiŭ śviedka abvinavačvańnia, jaki nazvaŭsia Vadałazavym. Jon byŭ u bałakłavie. Pa jaho słovach, Volha brała ŭdzieł u šeści, kryčała łozunhi suprać ułady, jaje papiaredzili, što šeście niezakonna. Chižynkova raniej skazała, što nichto nikoha nie papiaredžvaŭ, nijakaha šeścia nie było.
Taksama Vadałazaŭ śćviardžaŭ, što Volha była zatrymanaja na praśpiekcie Pieramožcaŭ, 5, choć Chižynkova raniej adznačyła, što jaje zabrali la Kafiedralnaha sabora.
Dalej u sudzie byŭ taki dyjałoh:
Vadałazaŭ: «Chižynkovu zapomniŭ, bo pryhožaja dziaŭčyna».
Advakat: «a astatnija nie?»
Vadałazaŭ: «Pa paraŭnańni z astatnimi jana pryhožaja».
Advakat Kaciaryna Malukova padaŭ sudu stanoŭčuju charaktarystyku z papiaredniaha miesca pracy — bresckaha «Dynama». Jana taksama pakazała, što ŭ spravie jość pamyłki i niedakładnaści.
Da prykładu, Vadałazaŭ śćviardžaŭ, što Chižynkova vykrykvała łozunhi suprać dziejnaha ŭrada, ale jakija mienavita — uspomnić nie zmoh. A ŭ pratakole dopytu śviedki napisana, što jana kryčała «Žyvie Biełaruś!» i «Sychodź!»
U 11.27 sudździa Anastasija Asipčyk syšła na naradu. Chižynkovaj dali mahčymaść pahavaryć z mužam. Jana skazała, što ŭmovy ŭtrymańnia na Akreścina narmalnyja, paprasiła jaho dać pravilnyja tabletki hadavancu i pieradać joj knihu Akudžavy. Skazała, što maralna hatovaja da 15 sutak.
U 11.40 sudździa viarnułasia i skazała, što sprava pieradadzienaja na dapracoŭku.
U 14.30 sud adnaviŭsia.
U novym pratakole vypravili čas zatrymańnia na 14.50-15.10. Śviedka Vadałazaŭ skazaŭ, što «tak šmat zatrymali, što moh pamylicca». Śviedka taksama nie zapomniŭ proźvišča supracoŭnika RUUS, jaki jaho apytvaŭ. Akramia taho, pa jaho słovach, supracoŭnik byŭ u bałakłavie, tamu jon nie zapomniŭ jaho źniešnaść. U jakim kabiniecie byŭ apytańnie, jon taksama nie pamiataje.
Advakat paprasiŭ vyklikać u jakaści śviedak ŭčastkovych inśpiektaraŭ, jakija składali pratakoły. Sudździa adchiliła zapyt.
Vynikovaje rašeńnie suda — 12 sutak aryštu. Uličvajučy, što jaje zatrymali 3 dni tamu, Volzie zastałosia pravieści za kratami jašče 9.
Advakat Chižynkovaj zajaviła, što jany buduć padavać skarhu na rašeńnie suda.
***
Paśla vybaraŭ Volha nieadnarazova vykazvała svajo mierkavańnie ab situacyi ŭ Biełarusi i vystupała suprać hvałtu. U vieraśni Chižynkova pazbaviłasia pracy ŭ Nacyjanalnaj škole pryhažości praz aktyŭnuju hramadzianskuju pazicyju.
