«Mis Biełaruś — 2008» Volha Chižynkova atrymała dadatkovyja 15 sutak aryštu za ŭdzieł u adnym z kastryčnickich Maršaŭ.
Chižynkovu zatrymali 8 listapada na Maršy narodaŭładździa i sudzili ŭčora. Jana atrymała 12 sutak źniavoleńnia ŭ Zavodskim sudzie Minska (sudździa Anastasija Asipčyk).
Siabry i svajaki spadziavalisia, što Volha vytryvaje źniavoleńnie i suciašali siabie tym, što viadomaja pryhažunia chacia b zmoža adznačyć ź imi svoj dzień narodzinaŭ 22 listapada. Ale ž nie.
12 listapada Chižynkovu sudzili znoŭ, ciapier u Centralnym sudzie Minska. Praces znoŭ išoŭ pa videasuviazi, ciapier jaje vyrašyli pakarać za udzieł u niesankcyjanavanym mierapryjemstvie, jakoje prachodziła až 11 kastryčnika — miesiac tamu.
Advakatka Kaciaryna Malukova paviedamiła, što dokazam na sudzie byli fota ŭ instahramie Volhi. Chižynkova pryznała vinu — i atrymała jašče 15 sutak aryštu ad sudździ Dźmitryja Karsiuka.
Vynikaje, što heta novy «trend» biełaruskich sudoŭ. Raniej, kali čałavieka chacieli dadatkova pakarać, čarhovyja sutki davali naprykancy terminu jaho źniavoleńnia. Ciapier dajuć adrazu.
Taksama 12 listapada sudzili pa palityčnym artykule Arynu Kanavałavu. Jana, jak i Chižynkova, užo adbyvaje termin za Marš (15 sutak). Kanavałavu dadatkova asudzili až za vieraśnioŭski Žanočy marš. Vyrak — taksama 15 sutak.
