Dzieci, jakija nikoli nie chvareli na COVID-19, mohuć mieć antycieły, što abaraniajuć ich ad hetaj chvaroby, piša Radyjo Svaboda pavodle The New York Times.
Novaje brytanskaje daśledavańnie pakazała, što pry niekatorych prastudnych zachvorvańniach mohuć zastavacca antycieły suprać novaha karanavirusu. Hety, mahčyma, tłumačycca fakt, što dzieci bolš abaronienyja, čym darosłyja.
Heta była vialikaja zahadka pandemii: čamu ŭ dziaciej mienš šancaŭ, čym u darosłych, zarazicca novym karanavirusam, a ŭ vypadku zaražeńnia — mienš šancaŭ zachvareć?
Mahčymaja pryčyna moža zaklučacca ŭ tym, što ŭ mnohich dziaciej užo jość antycieły da inšych karanavirusaŭ, miarkujuć daśledniki ź Instytutu Frensisa Kryka ŭ Londanie.
Prykładna kožnaja piataja prastuda ŭ dziaciej vyklikajecca virusami z hetaj siamji. Antycieły da tych virusaŭ taksama mohuć blakavać novy karanavirus, što vyklikaŭ ciapierašniuju pandemiju — SARS-CoV-2.
U daśledavańni, apublikavanym 13 listapada ŭ časopisie Science, hrupa na čale z kiraŭnikom labaratoryi retravirusnaj imunalohii ŭ instytucie Kryka Džordžam Kasyjotysam, paviedamlaje, što ŭ siarednim tolki 5 pracentaŭ darosłych majuć hetyja antycieły, a voś u dziaciej hety adsotak dasiahaje 43.
Styvien Ełedž, prafesar hienetyki ŭ Harvardzkaj medyčnaj škole, zhadžajecca z takoj acenkaj. Jon i jaho kalehi vyjavili, što ŭ mnohich ludziej jość antycieły da prastudy, vyklikanaj inšymi karanavirusami. U labaratornych daśledavańniach hetyja antycieły taksama blakujuć novy karanavirus.
Pavodle prafesara Ełedža, darosłyja mohuć zastudzicca 1-2 razy na hod, a dzieci chvarejuć 10-12 razoŭ. U vyniku ŭ dziaciej raźvivajucca antycieły da karanavirusu, jakija prysutničajuć amal uvieś čas; jany mohuć źmianšać symptomy prastudy i navat pakinuć jaje biez symptomaŭ, ale ŭsio ž zaraznaju.
Pry typovych virusnych infekcyjach imunnaja systema vypracoŭvaje antycieły dla baraćby ź virusami. Kali infekcyja padaŭlenaja, kolkaść niepatrebnych antyciełaŭ źmianšajecca. Ale ŭ arhaniźmie zastajucca tak zvanyja kletki pamiaci, jakija dazvalajuć chutka vypracoŭvać antycieły, kali virus znoŭ pasprabuje ŭvarvacca.
Čamu ž tady ŭ śviecie maje miesca pandemija? — pytajecca The New York Times. — Bolšaść z nas taksama pavinny byli b być abaronienyja kletkami pamiaci, jakija pakinuli raniejšyja karanavirusy.
Całkam mahčyma, što z časam vy stracicie imunnuju pamiać, — kaža prafesar Ełedž. Jon padazraje, što novy karanavirus moža pieraškodzić aktyvacyi kletak pamiaci, zdolnych reahavać na infekcyju.
Pavodle jaho słoŭ, infekcyja «moža vyklikać ćmiany ŭspamin, jaki z časam źnikaje». Kali heta tak, to dla abarony ad novaha karanavirusu spatrebicca zusim śviežaje zaražeńnie prastudnym karanavirusam, i navat tady abarona moža być abmiežavanaju ŭ časie.
Novy karanavirus taksama moža pieraškadžać vypracoŭcy antyciełaŭ, jakija specyjalna jaho atakujuć. Hetym moža rastłumačyć, čamu dzieci ź ich, zdavałasia b, bieśpierapynnymi prastudnymi chvarobami žyvuć našmat lepš, čym darosłyja.
Doktar Ełedž kaža, što, kali jon maje racyju ŭ dačynieńni da straty kletak pamiaci, to heta dobraja navina dla raspracoŭki vakcyn. Vakcyna pavialičvaje vypracoŭku antyciełaŭ biez prysutnaści virusu. Takim čynam, virus «nie znachodzicca na zadnim planie, parušajučy farmiravańnie kletak pamiaci», — kaža jon.
Inšaja mahčymaść zaklučajecca ŭ tym, što bolšaść darosłych nasamreč abaronienyja kletkami pamiaci ad papiarednich infekcyj, vyklikanych prastudaj. U nievialikaj kolkaści ludziej jość dastatkova antyciełaŭ u kryvi, kab abaranić ich u luby momant, tamu jany mohuć chutka vypracoŭvać novyja antycieły, kab źmienšyć ŭździejańnie novaha karanavirusu.
Hetym možna rastłumačyć toj fakt, što mnohija infikavanyja darosłyja chutka vyzdaraŭlivajuć.
