Fatohrafa ahienctva BiełaPAN Andreja Šaŭluhu zatrymali padčas aśviatleńnia padziej 15 listapada ŭ hateli «Arbita», što nad mietro «Puškinskaja», ale abvinavacili va ŭdziele ŭ niesankcyjanavanym masavym mierapryjemstvie. «Śviedkam» byŭ zašyfravany supracoŭnik milicyi. Suddzia Małašenka dała jamu 15 sutak, paviedamlaje radyjo «Svaboda».
Advakat pradstaviŭ u rasparadžeńnie suddzi kopiju damovy z hatelem «Arbita», redakcyjnyja zadańnie i paśviedčańnie ad ahienctva BiełaPAN, fotazdymki, apublikavanyja ahienctvam BiełaPAN, zroblenyja Andrejem Šaŭluha da zatrymańnia.
Śviedkami zajaŭlenyja žurnalistka BiełaPAN Jułija Kockaja i dyrektar BiełaPAN Dźmitryj Navažyłaŭ.
Pavodle pratakołu, Šaŭluha pryniaŭ udzieł u pikietavańni pa praśpiekcie Puškina, 39, z metaj vykazvańnia niazhody ź dziejučaj uładaj. Šaŭluha viny nie pryznaŭ.
Jon zajaviŭ, što jaho zatrymali ŭ numary hatela «Arbita», dzie jon pražyvaŭ z 14 listapada. Z hetaha numara jon vioŭ fota- i videafiksacyju taho, što adbyvałasia na vulicy, vykonvajučy svaje abaviazki žurnalista. Ź im znachodzilisia kalehi Jułija Kockaja i Andrej Rabčyk.
U 12.30 u numar zajšli 3 čałavieki ŭ spartovych kaściumach i maskach, nazvalisia milicyjaj. Raniej Šaŭluha mierkavaŭ, što heta supracoŭniki HUBAZiK. Zahadali skłaści ŭsiu techniku na łožak, abšukali. Dalej supracoŭniki AMAP supravadzili Kockuju, Šaŭluhu i Rabčyka ŭ RUUS Maskoŭskaha rajona.
Tam Šaŭluha ŭkazaŭ, što niazhodny sa składzienym na jaho pratakołam.
Šaŭluha taksama raspavioŭ, što da momantu jaho zatrymańnia masavych mierapryjemstvaŭ na praśpiekcie Puškina nie było.
Šaŭluha zajaŭlaje patrabavańnie, kab byli ahučanyja dadzienyja śviedki abvinavačańnia. Jon kaža, što ŭ CIP «paprysutničaŭ» na vaśmi sudovych pasiadžeńniach, i na ŭsich «śviedkam» byŭ adzin i toj ža «zašyfravany» supracoŭnik milicyi. Padsudnyja ŭ CIP znachodziacca ŭ adnym pamiaškańni i mohuć čuć, što adbyvajecca ŭ inšych pasiadžeńniach.
Suddzia Małašenka admoviła, spasłaŭšysia na toje, što sama vyznačyć asobu śviedki. Šaŭluha nastojliva pratestuje suprać udziełu śviedki, kaža, što toj ažyćciaŭlaje techničnaje zabieśpiačeńnie pracesu i prysutničaŭ na pasiadžeńni raniej. Suddzia Małašenka admaŭlaje i praciahvaje apytańnie śviedki. Toj paŭtaraje źviestki abvinavačańnia z pratakoła.
Śviedka, žurnalistka BiełaPAN Jułija Kockaja, pacviardžaje, što była zatrymanaja ŭ numary hatela «Arbita» razam z kalehami Andrejem Šaŭluham i Andrejem Rabčykam 15 listapada padčas vykanańnia žurnalisckich abaviazkaŭ. Byŭ zasłuchany dyrektar ZAT BiełaPAN Dźmitryj Navažyłaŭ, jaki pacvierdziŭ vydaču Šaŭluhu redakcyjnaha zadańnia i atrymańnie ad jaho fotazdymkaŭ rankam 15 listapada.
Advakat chadajničaje pra zapatrabavańnie zapisaŭ kamier videanazirańnia z hatela «Arbita». Suddzia Małašenka adchilaje chadajnictva — «nie ličyć nieabchodnym».
Advakat prosić spynić sudovy pieraśled.
Rašeńnie suddzi Małašenka — 15 sutak.
