U Homieli sudziać 26-hadovaha Hieorhija Vasilenku pavodle kryminalnaha artykułu 339 (złosnaje chulihanstva). 16 žniŭnia na masavaj akcyi pratestu ŭ Homli jon razam ź inšymi ludźmi źniaŭ čyrvona-zialony ściah z mačty na płoščy Lenina i zamianiŭ jaho na bieł-čyrvona-bieły, piša Radyjo Svaboda.
Spravu razhladaje sudździa Siarhiej Sałoŭski (sud Centralnaha rajona).
Abvinavačańnie hučała tak, što Hieorhi Vasilenka razam ź nieviadomymi asobami, «majučy namier na toje, kab učynić złosnaje chulihanstva», «naŭmysna parušajučy hramadzki paradak, demanstratyŭna vykazvajučy svaju ŭsiodazvolenaść i vyklučny cynizm, prajaŭlajučy niepavahu da hramadztva, pahardžajučy ahulnapryniatymi normami marali, supraćpastaŭlajučy svaju asobu hramadztvu i dziaržavie» źniaŭ čyrvona-zialony ściah i padniaŭ bieł-čyrvona-bieły, jaki «nie źjaŭlajecca atrybutam dziaržaŭnaj ułady».
Hieorhi vinu pryznaŭ častkova. Jon patłumačyŭ, što 16 žniŭnia ŭ Homieli była akcyja pratestu. Na płoščy było šmat ludziej i bieł-čyrvona-biełych ściahoŭ.
«Vakoł byli bieł-čyrvona-biełyja ściahi, va ŭsich ludziej byŭ taki ŭnutrany padjom, i tamu ja z hrupaj nieviadomych mnie ludziej udzielničaŭ u tym, što źniali čyrvona-zialony ściah i padniali bieł-čyrvona-bieły. Ja zrabiŭ heta tamu, što ŭ mianie byŭ taki ŭnutrany emacyjny padjom», — tłumačyŭ žychar Homla.
Śviedka-ideolah: «Zamiena dziaržaŭnaha ściaha abraziła i maje asabistyja pačućci»
Śviedkaj na sudzie vystupiła zahadčyca sektara idealahičnaj pracy adździełu idealohii, kultury i pa pracy z moładździu harvykankamu Alena Barkova.
«Dziaržaŭny ściah źjaŭlajecca vielmi važny, jon — dziaržaŭny symbal. Jaho vykarystańnie i pryznačeńnie rehulujecca zakonam, dzie prapisana, kali i dzie ściah vykarystoŭvajecca, treba zabiaśpiečvać pavažlivaje staŭleńnie da jaho», — tłumačyła na sudzie ideolah.
Jana zaznačyła, što zamiena ściaha mahła paciahnuć «abrazu pačućciaŭ hramadzian Biełarusi».
«Mnie telefanavali znajomyja i skardzilisia, što heta niedapuščalna — zamiena dziaržaŭnaha symbalu na niezarehistravanuju symboliku. Ja była aburanaja taksama. Zamiena dziaržaŭnaha ściaha abraziła i maje asabistyja pačućci i šmat kaho, bo mnie telefanavali ludzi, u jakich heta vyklikała krajnie nehatyŭnuju reakcyju», — zaznačyła śviedka.
Milicyjant: «Nam skazali nia ŭmiešvacca, kab nie nakalać abstanoŭku»
Na sudzie śviedčyli supracoŭniki milicyi, jakija ŭ toj dzień prysutničali na płoščy Lenina, ale stajali za płotam. Jany bačyli, jak hrupa asob zamianiła ściah, i paviedamili pra heta ŭ «aperatyŭna-sytuacyjny centar».
«Nam adkazali, kab my nia ŭmiešvalisia, a tolki nazirali, kab nie nakalać abstanoŭku. Ludzi pakłali ściah kala płotu, my jaho zabrali i zanieśli ŭ pałac Rumiancavych i Paskievičaŭ», — raspavioŭ adzin ź milicyjantaŭ.
Sud praciahniecca 23 listapada.
