Kiraŭnik chakiejnaj fiederacyi Dźmitryj Baskaŭ vystupiŭ z aficyjnaj zajavaj dla ŚMI.
«Ja, Dźmitryj Baskaŭ, trenier, funkcyjanier, syn, muž, baćka, u rešcie rešt, prosta hramadzianin svajoj krainy, siońnia chaču źviarnucca da ŭsich biełarusaŭ i adkazać na šmatlikija zapyty ŚMI, jakija pastupili mnie apošnija dni.
Kožnamu z nas užo nie pieršy miesiac baluča hladzieć na toje, jak razhojdvajuć našu krainu. Jak sprabujuć razburyć toje, što stvarałasia dziesiacihodździami. I asabliva na toje, jak nackoŭvajuć miž saboj ludziej, pravakujuć kanflikty i nianaviść.
Užo vielmi šmat hadoŭ maja hramadzianskaja pazicyja zastajecca niaźmiennaj, ja nikoli jaje nie chavaŭ i nie budu chavać. I toje, što jana razychodzicca z pazicyjaj mnohich «niezaležnych» žurnalistaŭ i pratesna naładžanaj častki hramadstva, upeŭnieny, lažyć ciapier u asnovie tak chutka vykazanych u dačynieńni da mianie biezhruntoŭnych abvinavačvańniaŭ. Ja heta padkreślivaju: abvinavačvańniaŭ u tym, da čaho ja nie maju nijakaha dačynieńnia, nahodaj dla jakich pasłužyła vyklučna adroznaja ad čyichści pohladaŭ maja asabistaja hramadzianskaja pazicyja.
Bolš za toje, mienavita hetyja ludzi niepasredna zaraz sprabujuć ŭbačyć mianie tam, dzie mianie nie było i niama, navat u niejkich aeraportach, samalotach ci adrazu niekalkich haradach i krainach adnačasova. Biełaruś — maja Radzima, heta vydatnaja kraina, u jakoj ja naradziŭsia i zaŭsiody budu žyć.
A tym, chto siońnia adkryta zaklikaje pahražać maim dzieciam i žoncy, ja mahu zadać tolki adno pytańnie: vy i jość tyja samyja «nievierahodnyja» i «mirnyja» biełarusy? Svaimi dziejańniami vy tolki ŭmacoŭvajecie ćviordaść maich pierakanańniaŭ!» — cytuje Baskava hockey.by.
Nahadajem, niekatoryja śviedki zajavili, što bačyli ŭ viečar zabojstva Ramana Bandarenki na «Płoščy pieramien» čałavieka, źniešnie padobnaha da Dźmitryja Baskava.
