Hienieralnaja prakuratura raspačała kryminalnuju spravu ŭ dačynieńni da doktara Haradskoj kliničnaj balnicy chutkaj miedycynskaj dapamohi, jaki padzialiŭsia danymi pra miedahlad Ramana Bandarenki z žurnalistam.

Kryminalnaja sprava zaviedziena pa č. 3 art. 178 Kryminalnaha kodeksa Respubliki Biełaruś («razhałošvańnie miedycynskaj tajamnicy»).

«Tym samym jon vydaŭ miedycynskuju tajamnicu, pry hetym pradstaviŭ niedakładnuju infarmacyju», — udakładniajecca ŭ paviedamleńni Hienprakuratury.

Viedamstva adznačaje, što takija dziejańni z boku doktara i žurnalista paciahnuli za saboj «ciažkija nastupstvy, jakija vykazalisia ŭ padvyšanaj napružanaści ŭ hramadstvie, stvareńni atmaśfiery niedavieru da dziaržaŭnych orhanaŭ i pamknieńniaŭ hramadzian da ahresii i supraćpraŭnych dziejańniaŭ».

Padazravanych zatrymali, udakładnili ŭ Hienprakuratury.

Varta adznačyć, što SK i Alaksandr Łukašenka zajavili pra toje, što Bandarenka byŭ pjany, paśla čaho miedyki pieradali ŭ ŚMI miedycynskija dakumienty, jakija śviedčyli, što ŭ kryvi Bandarenki byŭ nul ałkaholu.

31-hadovy mastak Raman Bandarenka byŭ schopleny ludźmi ŭ maskach, kali vyjšaŭ abaraniać murał u dvary doma na vulicy Čarviakova.

Jak pakazali žurnalisckija rasśledavańni, siarod hetych ludziej byli asoby, padobnyja da chakiejnaha treniera Dźmitryja Baskava i instruktara čaści Unutranych vojskaŭ 3214 Dźmitryja Šakuty. Jany pieradali jaho AMAPu. Praź niekalki hadzin chutkaja dapamoha zabrała Bandarenku z Centralnaha RUUS nieprytomnym. Jašče praź dzień jon pamior.

Bandarenka ŭ 2014—2015 hadach adsłužyŭ terminovuju słužbu ŭ toj samaj čaści 3214, dzie słužyć Šakuta.

Baskaŭ i Šakuta — ludzi, blizkija da siamji Alaksandra Łukašenki. 

Učora ŭ telehram-kanałach źjaviŭsia aŭdyjozapis telefonnaj razmovy ludziej z hałasami, padobnymi da Baskava i Šakuty, u jakoj tyja śćviardžajuć, što na momant pieradačy AMAP Bandarenka byŭ u prytomnaści, bo «dziorhaŭsia», a AMAPaŭcy ŭ aŭtobusie jaho «abmaładzili» — na słenhu siłavikoŭ heta aznačaje źbili. 

Dastaviernaść aŭdyjozapisu nichto nie paćvierdziŭ i nie abvierh, Baskaŭ i Šakuta niedastupnyja dla žurnalistaŭ.

U aŭdyjozapisie hołas, padobny da Baskava, kaža druhomu Dzimu, što «Nataša» ŭžo sustrełasia z «Kazakievičam» — heta proźvišča namieśnika ministra ŭnutranych spraŭ pa hetym pytańni. «Karaciej, jana tam užo jeździła sustrakałasia z kimści, razmaŭlała, tam jany raźbirajucca ciapier. Papiaredziła ŭsich, što tam, kali što, to nas nie było nidzie».

Pakutnictva i śmierć Ramana Bandarenki vyklikała šok u hramadstvie.

Na miesca, adkul jaho zabraŭ AMAP, pryvieźli mora śviečak i kvietak. Tady ŭ niadzielu ŭviečary łukašenkaŭcy ačapili hety dvor i vyvieźli ŭvieś miemaryjał. Abłava ŭ kvartale doŭžyłasia 16 hadzin, usiaho za tuju niadzielu ŭ Minsku zatrymali bolš za 1250 čałaviek, bolšaść ź ich — na miescy pakutnictva Ramana Bandarenki.

Dapoŭniena: Žurnalistka Tut.by Kaciaryna Barysievič, jakaja rychtavała materyjał pra stan Ramana Bandarenki, pierastała vychodzić na suviaź. Paźniej jana źjaviłasia ź siłavikami.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?