U Brasłavie zatrymali dvuch supracoŭnikaŭ chlebazavoda, Andreja Vałušku i Filipa Buleviča. Ich padazrajuć u źniavazie načalnika Brasłaŭskaha RAUS, paviedamlaje Radyjo Svaboda.
Padrabiaznaści spravy pakul nieviadomyja. Svajaki zatrymanych śćviardžajuć, što jany prachodziać padazravanymi ŭ kryminalnaj spravie, pačataj pavodle artykułu 369. Paśla pieratrusaŭ 20 listapada ich zatrymali, jany znachodziacca ŭ Brasłaŭskim RAUS. Advakat pakul nie daje nijakaj infarmacyi.
Dziaŭčyna Filipa Buleviča Taciana raskazała, što z vobšukam a 8-j hadzinie da jaje pryjšli dvoje ŭ maskach, učastkovy i paniatyja. Vielmi chutka pakazali paśviedčańni i začytali pastanovu.
«Pieratrus ciahnuŭsia bolš za paŭtary hadziny. Usio pieraviarnuli, zabrali jaho kamputar, telefon, moj noŭtbuk. Chacieli zabrać moj telefon, ja nie addała. I pravieryli telefon i kamputar majho 9-hadovaha dziciaci. Skazali, što Filipa zabirajuć jak padazravanaha na hadzinu ŭ Śledčy kamitet. A viečaram piatnicy ja daviedałasia, što jon znachodzicca ŭ našym RAUS», — skazała Taciana.
U vychodnyja ŭ Taciany pryniali pieradačy dla Filipa.
«Na pytańnie, za što zabrali chłopcaŭ, skazali «Raźbiaremsia». U pastanovie było paznačana, što za źniavahu Biaržanina «pry vykanańni». My daviedalisia, što Biaržanin — heta načalnik RAUS. Jaho proźvišča my daviedalisia tolki ŭ piatnicu; raniej ni ja, ni Filip naohuł nia viedali hetaje proźvišča», — kaža Taciana.
Pavodle Taciany, prakuror Brasłaŭskaha rajonu joj skazaŭ, što nijakich pastanoŭ na vobšuk nie padpisvaŭ i nia ŭ kursie, što ŭ horadzie pravodziać pieratrusy.
«Siłaviki pačali žorstka cisnuć na mianie praź blizkich»
Siastra 26-hadovaha Andreja Vałuški Kryścina skazała, što pieratrus byŭ u kvatery, dzie žyvie brat, i ŭ domie baćki, za 20 kilametraŭ ad Brasłava. Andrej taksama prachodzić u spravie, pačataj pavodle 369-ha artykułu. Pavodle Kryściny, jaje brat taksama dahetul nia viedaŭ, chto taki Biaržanin.
Kryścina ciapier žyvie ŭ ZŠA. Jana skazała, što stvaryła hrupu ŭ telehram-kanale «Brasłaŭ dla žyćcia».
«Heta zvyčajnaja hrupa, dzie ŭsie dzielacca aktualnymi navinami. Pieršyja napadki na maju siamju pačalisia z taho, što pačali šukać mianie, prychodzili dadomu, praz maci sprabavali vyjści. Maci adšukali na pracy. Biaz pozvy i jakich-niebudź dakumentaŭ supracoŭniki milicyi sprabavali dapytać jaje, ale jana admoviłasia. Potym na nastupny dzień pryjechali z pozvaj i dapytali. Mama adkryta skazała, što ja žyvu ŭ ZŠA», — kaža Kryścina.
Paśla hetaha pačali cisnuć na ŭdzielnikaŭ hrupy. Pavodle Kaciaryny, u čatyroch chłopcaŭ byli pieratrusy, kanfiskavali techniku, ich aryštoŭvali i davali štrafy, prakuror papiaredziŭ ich, kab nia brali ŭdziełu ŭ akcyjach. Aproč ich jašče kala 15 čałaviek atrymali štrafy.
«9 žniŭnia brata taksama zatrymlivali i, kali jon byŭ u izalatary, jamu pahražali, što, jak tolki ja viarnusia ŭ Biełaruś, mianie pasadziać. Na mianie hetyja zapałochvańni nia dziejničajuć, i ja, naturalna, hrupy z Telegram nie vydalała. Paśla hetaha siłaviki pačali žorstka cisnuć na mianie praź blizkich», — kaža Kryścina.
