Skrynšot ź videa. Siłaviki na aŭtobusach i aŭtazakach suprać piensijanieraŭ. 23 listapada, Minsk.
Pusty praśpiekt i zabłakavanyja vulicy, zakryty vychad ź mietro «Płošča Lenina», sotni amapaŭcaŭ u čornym — tak vyhladaŭ centr Minska ŭ paniadziełak. Pryčyna ŭsiaho hetaha — štotydniovy Marš piensijanieraŭ.
Tolki staryja ludzi ciapier mohuć dazvolić sabie svabodu schodu na centralnym praśpiekcie stalicy Biełarusi. Maładziejšych z płakatami ci ściahami tut chapajuć biaźlitasna.
Adnak siońnia łukašenkaŭcy pajšli dalej, siła była ŭžytaja i suprać piensijanieraŭ. Staryja pakazali niemałuju śmiełaść, pajšoŭšy Maršam u takich umovach.
Siłaviki atačyli kałonu. Voś jak heta było:
Piensijanieraŭ nie puskali, šturchali. Ludzi skandavali na adras Alaksandra Łukašenki «Pašoł von, ty i tvoj AMON!», a na adras siłavikoŭ — «Fašysty!» i «Chałui».
Zaŭvažcie, što heta videa, źniatyja žycharami horada z akon, bo žurnalistaŭ ciapier masava zatrymlivajuć.
U vyniku siłaviki raśsiekli kałonu na dźvie. Častka starych prarvałasia da płoščy Pieramohi, dzie milicyjanty zatrymali čałavieka sa ściaham. Druhaja častka pratačyłasia pa vulicy Janki Kupały ŭ bok Opiery.
Kala Opiery AMAP iznoŭ raśsiok druhuju kałonu piensijanieraŭ na jašče dźvie. Adna pajšła ŭ bok praśpiekta Niezaležnaści pa vulicy Paškievič, druhaja — pa Kamunistyčnaj.
U Asmołaŭcy AMAP jašče raz atakavaŭ piensijanieraŭ. Vidavočcy paviedamlajuć pra zatrymańni.
Tolki nievialikaja častka ŭdzielnikaŭ Maršu zdoleła prarvacca da płoščy Jakuba Kołasa.
Voś jašče trochi fota i videa z maršu:
***
Heta ŭžo vośmy marš piensijanieraŭ, pieršy prajšoŭ 5 kastryčnika. Ideja Maršaŭ u piensijanieraŭ uźnikła tady, kali ŭłady stali masava zatrymlivać i adličvać pratestujučych studentaŭ. Ludzi stałaha vieku paličyli, što, kali maładziejšym vykazvacca nie dajuć, to danosić dumku hramadstva musiać jany. Niekatoryja z maršaŭ adznačylisia dramatyčnymi sutyčkami z pravaachoŭnikami. Adnojčy suprać piensijanieraŭ puścili haz — kali tyja adbili zatrymanych miedykaŭ kala 1-j kliničnaj balnicy.