Apošnija miesiacy pašyrylisia vypadki błakavańnia ruchu čyhunačnaha transpartu šlacham nakładańnia mietaličnaha drotu na rejki i psavańnia sihnalizacyi. 

Pres-sakratarka MUS Biełarusi Volha Čamadanava ŭ aficyjnym telehram-kanale pressmvd paviedamiła pra zatrymańnie hrupy, datyčnaj da złačynstvaŭ suprać hramadskaj biaśpieki. Pra toje, jak raźvivajecca sprava, piša «Viasna». 

Na niekalkich mužčyn i žančynu z Bresta (usim ad 26 da 38 hadoŭ) vyjšli apieratyŭniki kryminalnaha vyšuku abłasnoj milicyi. Usich zatrymali 11 listapada z dapamohaj AMAPa.

Kampanija padazrajecca ŭ tym, što niezakonna ŭmiašałasia ŭ funkcyjanavańnie sistem, jakija zabiaśpiečvajuć biaśpieku ruchu čyhunačnaha transpartu, raźbiła šybu ŭ «aporcy», padpaliła šyny na darozie i raźviesiła vialikija lalki milicyjantaŭ z asudžeńniem represij u krainie.

Raniej paviedamlałasia, što pudziły z nadpisami «AMAP», «mient» i «chłus» źjavilisia ŭ abłasnym centry: paviesili ich na drevach i aharodžy puciepravoda «Zachodni abchod».

Taksama 29 kastryčnika na pierahonie pablizu stancyi «Teŭli» (Kobrynski rajon) złamyśniki zabłakavali mietaličnym drotam aŭtamatyzavanuju sistemu kiravańnia i kantrolu rucham ciahnikoŭ. Heta vyklikała zatrymku sastavaŭ i zboj hrafika.

Paśla hetaha, nočču 8 i 9 listapada, zatrymanyja, miarkuje śledstva, spačatku padpalili na prajeznaj častcy aŭtamabilnyja pakryški, zatym kamianiami raźbili šybu ŭ haradskim apornym punkcie achovy pravaparadku.

24 listapada ahučanaja infarmacyja Śledčaha kamiteta, što ŭ miežach kryminalnaj spravy byli zatrymanyja dzieviać čałaviek, da piaci ź ich u ciapierašni čas vykarystanaja miera strymańnia ŭ vyhladzie zaklučeńnia pad vartu, dvum vystaŭlenaje abvinavačvańnie pa č. 2 art. 339 KK (Złosnaje chulihanstva, učynienaje paŭtorna, hrupaj asob).

«Asoby astatnich udzielnikaŭ vyznačajucca, — adznačyli ŭ SK. — Śledčyja pracujuć ź fihurantami, vyvučajecca ich asabistaja pierapiska i źmieściva mabilnych telefonaŭ. Pryznačanyja šerah ekśpiertnych daśledavańniaŭ pa kanfiskavanych na miescy zdareńnia i padčas pieratrusaŭ pradmietach i abjektach. Taksama śledčymi ŭstanoŭlena dačynieńnie kampanii da inšych epizodaŭ supraćpraŭnaj dziejnaści. Rasśledavańnie kryminalnaj spravy praciahvajecca».

Što viadoma na hety čas pravaabaroncam?

11 listapada a 5 hadzinie ranicy da rabotnika čyhunki ź Bieraścia Jaŭhiena Komvula pryjšli ź pieratrusam, padčas jakoha zabrali hrošy, kampjutary, telefony i fłeški. Čyhunačnika pieršapačatkova zatrymali ŭ miežach kryminalnaj spravy i dastavili ŭ Leninskaje RAUS.

Ranicaj 12 listapada supracoŭniki milicyi ŭ miežach kryminalnaj spravy nibyta za psavańnie sihnalizacyi na čyhuncy pryjšli ź pieratrusam da Alaksandra Bułyhi. U pastanovie ab praviadzieńni pieratrusu niapravilna było ŭkazana imia pa baćku, tamu pieratrus nie praviali da vypraŭleńnia pamyłki ŭ pastanovie.

Sam Bułyha zatrymany na 72 hadziny i źmieščany ŭ IČU Bieraścia.

Pravaabaroncam viadomaja infarmacyja pra zatrymańnie muža i žonki Siarhieja i Volhi Silič, invalida pa zroku i dyjabietyka. Pavodle papiaredniaj infarmacyi, jany padazrajucca ŭ psavańni čyhunačnaj sihnalizacyi pa č. 1 art 309 KK RB. Svajaki paviedamlajuć, što zatrymanych bolej, mužčyn źbivajuć, kab dali pryznalnyja pakazańni.

Bieraściejskija pravaabaroncy paviedamlajuć: 

«Zatrymańni adbyvalisia ŭ žorstkaj formie: jak raspaviali svajaki, minimum adnamu čałavieku vybili łomam dźviery ŭ kvatery i nadzieli čorny miech na hałavu, jak minimum traich źbivali — ludzi ŭ čornym padčas abo paśla zatrymańnia (adznačym, što paśla zatrymańnia ludzi dastaŭlalisia ŭ Leninskaje RAUS Bieraścia). Adnamu z zatrymanych dakładna daviałosia vyklikać chutkuju dapamohu.

Padobna, što akramia fizičnaha hvałtu na padazravanych akazvaŭsia cisk u inšych formach. Naprykład, była zatrymanaja žonka adnaho z padazravanych, u jakoj dyjahnastavany insulinazaležny dyjabiet, a taksama invalidnaść 2-j hrupy pa zroku. Svajaki apisvali heta nie inakš jak «trymajuć u zakładnikach».

Drobny sabataž na čyhuncy

Tym nie mieniej, dziejańni hramadzian pa błakavańni čyhunačnych šlachoŭ praciahvajucca. Niekalki faktaŭ:

Mužčyny z Radaškavičaŭ nakłali mietaličny drot na čyhunku. Ich złavili milicyjaniery.

Zatrymanyja skazali, što źbiralisia raźlić bienzin na šlachu adychodu, dumajučy, što takim čynam zmohuć źbić sa śledu słužbovaha sabaku. Ciapier mužčyny znachodziacca ŭ izalatary časovaha ŭtrymańnia.

Śledčyja raspačali kryminalnuju spravu za naŭmysnaje pryviadzieńnie ŭ nieprydatnaść šlachoŭ znosin.

A 22 listapada zarehistravany fakt iłžyvaj zaniataści čyhunačnych šlachoŭ z-za nakładańnia mietaličnaha drotu ŭ Barysaŭskim rajonie. Pra heta paviedamiła ŭ svaim telehram-kanale pres-sakratarka Ministerstva ŭnutranych spraŭ Volha Čamadanava.

Pa jaje źviestkach, u Minskaj vobłaści takija fakty zafiksavanyja taksama ŭ Krupskim i Dziaržynskim rajonach. U suviazi z hetym śledčymi orhanami raspačatyja kryminalnyja spravy.

Raniej paviedamlałasia pra anałahičnyja vypadki ŭ Mahiloŭskaj vobłaści, a taksama ŭ vakolicach Minska.

U vyniku milicyja ciapier patruluje čyhunačnyja pierahony ŭ niekatorych rajonach krainy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?