U rasparadžeńni Tut.by akazaŭsia adkryty list supracoŭnikaŭ RNPC dziciačaj ankałohii, hiematałohii i imunałohii. Miedyki tłumačać, čamu jany vyrašyli napisać zajavy na zvalnieńnie ŭ znak niazhody z tym, što ŭ klinicy źmianili dyrektara. Raniej 16 supracoŭnikaŭ zajavili pra svoj sychod. Zajavu ab zvalnieńni adnoj z supracoŭnic ŭžo padpisali — zahadčycy ankahiematałahičnym adździaleńniem RNPC dziciačaj ankałohii, hiematałohii i imunałohii Nadziei Piatroŭskaj.

Fota: Maryna Sierabrakova, Tut.by.

Fota: Maryna Sierabrakova, Tut.by.

«Siońnia my, miedycynskija rabotniki Centra dziciačaj ankałohii, hiematałohii i imunałohii, chočam publična ahučyć svaju pazicyju nakont padziej, jakija adbyvajucca ŭ našym centry.

Ciapier nas, jak i mnohich inšych u krainie, pazbaŭlajuć prava mieć ułasnaje mierkavańnie i adkryta jaho vykazvać, nie aścierahajučysia za ŭłasnuju biaśpieku.

Nami manipulujuć, zaklikajučy da našaj adkaznaści pierad chvorymi dziećmi (pacyjentami), nieadnarazova zajaŭlajučy pra toje, što miedyk u našaj krainie nie maje prava na strajk, na ŭdzieł u mitynhach i pikietach, znosiny sa ŚMI i navat na vykazvańnie svaich dumak u sacyjalnych sietkach. Naša aktyŭnaść traktujecca sistemaj jak sposab atrymać «pucioŭku ŭ ES», zadavalnieńnie palityčnych ambicyjaŭ, adsutnaść pačućcia abaviazku i nieprafiesijanalizm.

Paviercie, kožnamu z nas było vielmi ciažka zrabić krok pa svaich piersanalnym pryčynach i vyrašycca na zvalnieńnie. Ale składaniej za ŭsio heta zrabić z-za prafiesijnaha abaviazku pierad pacyjentami (heta dzieci z ankahiematałahičnaj patałohijaj).

Nam, jak i ŭsim ludziam, jakija majuć serca, ciažka pracavać, uśviedamlajučy niaspynny ŭ krainie hvałt. Svaju pazicyju nakont hetaha my nieadnarazova ahučvali ŭ videazvarocie i listach, adrasavanych u Ministerstva achovy zdaroŭja.

Praktyčna niemahčyma stała pracavać, kali niekatoryja z našych kaleh paciarpieli niepasredna za svaju hramadzianskuju pazicyju: byli zatrymanyja i pryciahnutyja da administracyjnaj adkaznaści. My sutyknulisia z adsutnaściu padtrymki z boku prafsajuza miedycynskich rabotnikaŭ i prafiesijnych tavarystvaŭ. Pa našaj infarmacyi, Ministerstva achovy zdaroŭja nastojliva rekamiendavała dyrektaru centra zvalniać aktyvistaŭ i «supracoŭnikaŭ z 23.34».

Apošniaj kroplaj stała źmiena kiraŭnictva centra i pryznačeńnie novaha dyrektara biez vopytu raboty ŭ ankałohii. Centr dziciačaj ankałohii — heta asablivaja ŭstanova. Dyrektar tut nikoli nie vykonvaŭ tolki administracyjnuju rolu. Heta ŭ pieršuju čarhu asnoŭny člen dyjahnastyčnaj, navukovaj i lačebnaj kamandy, kuratar lačebnych pratakołaŭ i navukovych prajektaŭ, aktyŭny ŭdzielnik kansiliumaŭ, kamisij pa rašeńni žyćciova važnych pytańniaŭ u dačynieńni da pacyjentaŭ ankahiematałahičnaha profilu. Pośpiech terapii zaležyć ad zładžanaj pracy kalektyvu, prafiesijanalizmu kožnaha supracoŭnika i ŭ pieršuju čarhu ad ekśpiertnaha mierkavańnia kiraŭnika. Za dyrektaram zaŭsiody zastavałasia apošniaje słova na kansiliumach pa samych składanych pacyjentach i adkaznaść za pryniataje rašeńnie.

Na siońnia my vykarystoŭvali ŭsie mahčymyja miechanizmy daniasieńnia našaj pazicyi da sistemy, i rašeńnie ab zvalnieńni dla mnohich — adziny sposab vykazać svaju hramadzianskuju pazicyju. U nas nie zastałosia iluzij pra značnaść svajoj roli jak śpiecyjalistaŭ.

My z aptymizmam hladzim u budučyniu! Spadziajomsia, što našy dziejańni buduć spryjać bolš chutkamu adnaŭleńniu spraviadlivaści, humanistyčnych pryncypaŭ, demakratyčnych svabodaŭ i roskvitu našaj krainy!»

Nahadajem, 23 listapada ŭ RNPC dziciačaj ankałohii, hiematałohii i imunałohii pradstavili novaha dyrektara. Častka kalektyvu napisała zajavy na zvalnieńnie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?