Na kanale STB vyjšła «rasśledavańnie» Ryhora Azaronka pra śmierć Ramana Bandarenki.

U siužecie niama nivodnaha novaha słova pra pryčyny abo abstaviny zabojstva. Chto ludzi, što ciahnuli Ramana ŭ mašynu? U jakim stanie jaho dastavili ŭ milicyju? Chto vyklikaŭ chutkuju dapamohu? Padrabiaznaje rasśledavańnie tydzień tamu anansavaŭ Alaksandr Łukašenka, a naŭzamien telehledačy atrymali tolki tancy Azaronka vakoł analizu na ałkahol.

Prapahandyst paviedamiŭ, što Bandarenka nibyta «atrymaŭ traŭmu ŭ dvarovaj bojcy, pastupiŭ z ałkaholnaj intaksikacyjaj u Balnicu chutkaj miedycynskaj dapamohi».

U siužecie byli pakazany dakumienty ab stanie Ramana Bandarenki, dzie było paznačana pra nulavuju kolkaść etanołu ŭ arhaniźmie Bandarenki. Nahadajem, dakumienty apublikavaŭ Tut.by.

«Adna cikavaja detal: apieracyja 11.11.2020 — pacyjent pastupiŭ u pryjomnaje adździaleńnie balnicy 12.11.2020 u 00:03 i prabyŭ tam paŭhadziny, paśla hetaha jaho adpravili ŭ reanimacyju. Stop. Ale ž na druhoj staroncy my čytali, što apieracyju jamu zrabili ŭžo 11 listapada. Sam dakumient bieź piačatki i podpisu. Atrymlivajecca, doktar vielmi śpiašaŭsia adpravić fejk žurnalistam?» — paviedamlaje hledačam Azaronak.

Azaronak nazyvaje dakumienty z 0 pramile ałkaholu «fejkam», adnak «sapraŭdnych» dakumientaŭ hledačam nie pakazali.

U siužecie pakazali i zvarot Arcioma Sarokina, doktara, jaki, jak miarkujecca, pieradaŭ žurnalistam dakumienty ab stanie zdaroŭja Ramana Bandarenki. Sarokin prachodzić padazravanym u miežach kryminalnaj spravy.

U zvarocie doktar paviedamiŭ, što pryznaŭ svaju vinu.

«Heta maja pamyłka, nieabdumany krok, što ja paddaŭsia na ŭhavory dziaŭčyny, jakaja pradstaviłasia žurnalistkaj, i pieradaŭ joj infarmacyju ź miedycynskaj dakumientacyi», — skazaŭ Sarokin.

U svajoj pramovie doktar Sarokin pryznaje vinu, ale dla čahości asobna zhadvaje, što ŭ jaho jość advakat, «jakoha jon vybraŭ sam». Aryštavanamu čałavieku składana vybrać advakata samomu — albo jurysta znachodzić siamja, albo pryznačajecca dziažurny advakat. Tym nie mienš Sarokin kaža hetyja słovy.

«Chaču skazać usim, chto mianie viedaje: nie palityzujcie hetuju situacyju ŭ adnosinach da mianie. Tut niama nijakaj palityki, heta byŭ moj zusim nieabdumany krok. Sam ja nie revalucyjanier, nie ŭdzielničaju ni ŭ jakich akcyjach, maršach. Adzinaje, čaho ja chaču, heta viarnucca ŭ siamju da žonki, dziaciej, na lubimuju pracu», — skazaŭ lekar.

U siužecie prapahandyst Azaronak źviarnuŭsia da miedycynskaj supolnaści: «Kali vy pad uździejańniem emocyj zabyvajecie vašy abaviazki i pačynajecie hulać u palityčnyja hulni, čaho vy dabivajeciesia?»

Admietna, što nivodzin z daktaroŭ Balnicy chutkaj dapamohi nie daje kamientar pa temie — ź ludziej u kadry jość tolki namieśnik hienieralnaha prakurora. Nu i fonava hučyć manałoh viadučaha Azaronka.

U siužecie byŭ pakazany kamientar namieśnika hienieralnaha prakurora Hienadzia Dysko nakont zatrymańnia žurnalistki TUT.BY Kaciaryny Barysievič.

Darečy, nijakaj pramovy žurnalistki Kaciaryny Barysievič i nijakaha videa dopytu ź jaje ŭdziełam niama. Tamu što ad jaje tak i nie zmahli atrymać nijakich pakazańniaŭ i «raskajańniaŭ»?

Prakuror nahadaŭ, što rašeńniem Ministerstva infarmacyi prypynienaja dziejnaść Tut.by ŭ jakaści srodku masavaj infarmacyi. Taksama prakuror paskardziŭsia, što Barysievič nie stała źviartacca pa infarmacyju da aficyjnych orhanaŭ i arhanizacyj.

Śćviardžajecca, što «takija dziejańni pryviali da aktyŭnaha abmierkavańnia i čarhovaha kanfliktu ŭ hramadstvie, nakiravanaha na padryŭ davieru hramadzian i aficyjnaj infarmacyi i ŭ cełym pravaachoŭnym orhanam i orhanam dziaržaŭnaj ułady».

Namieśnik hienprakurora taksama paviedamiŭ, što pa vynikach sudova-chimičnaj ekśpiertyzy ŭ analizach Ramana Bandarenki nibyta byŭ znojdzieny ałkahol.

«Kožny moh źviarnuć uvahu, što ŭ adnym z apublikavanych dakumientaŭ adsutničajuć vyniki daśledavańnia inšych bijałahičnych srodkaŭ na kolkaść etanołu, u tym liku mačy. Pa vynikach sudova-chimičnaj ekśpiertyzy ŭ bijałahičnych asiarodździach Ramana Bandarenki, uziatych miedpracaŭnikami tady ž u Balnicy chutkaj miedycynskaj dapamohi, znojdzieny ałkahol», — kaža prakuror.

«Apublikavanyja ŭ sietcy internet kopii dakumientaŭ ab vynikach adsutnaści etyłavaha śpirtu ŭ kryvi Ramana Bandarenki aformlenyja va ŭmovach terminovaha akazańnia miedycynskaj dapamohi, nie ŭličvajuć ŭvieś śpiektr nieabchodnych daśledavańniaŭ dla vyśviatleńnia stanu pacyjenta», — paviedamlaje hienprakuror.

U efiry STB prahučaŭ zapis telefonnaj razmovy, jak śćviardžajecca, maci Bandarenki ź nieviadomym.

Dziaržava nie chavaje, što svajakoŭ Bandarenki prasłuchoŭvali, i biez anijakich vahańniaŭ vydaje hetyja niezakonna atrymanyja aŭdyjazapisy ŭ efir.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?