Na dniach byŭ zatrymany były načalnik kryminalnaha vyšuku Zavodskaha RUUSa Dźmitryj Kułakoŭski. Jon pakinuŭ słužbu nieŭzabavie paśla prezidenckich vybaraŭ, pakolki byŭ nie zhodny ź dziejańniami ŭłady. U kastryčniku jaho zatrymali supracoŭniki ŭpraŭleńnia ŭłasnaj biaśpieki milicyi, amal miesiac jon pravioŭ u izalatary na Akreścina, dzie ź im abychodzilisia tak, što na znak pratestu jon hłytaŭ mietaličnyja pradmiety. U dačynieńni da Kułakoŭskaha zaviedziena kryminalnaja sprava pa fakcie abrazy pradstaŭnika ŭłady. Dźmitryj sprabavaŭ pakinuć Biełaruś, ale jaho zatrymali na miažy i dastavili ŭ izalatar, piša Tut.by.
Čytajcie taksama: Daškievič: «Za piać hadoŭ u turmach ja takoha nie bačyŭ — na Akreścina katujuć ludziej, pra heta treba kryčać»
Dźmitryj Kułakoŭski jašče niadaŭna ŭznačalvaŭ kryminalny vyšuk u Zavodskim RUUSie Minska. Pracavaŭ u milicyi z 2006 hoda, maje prafiesijnyja ŭznaharody i padziaki ad kiraŭnictva.
Paśla vybaraŭ Dźmitryj zajaviŭ, što nie zhodny ź dziejańniami ŭłady. U vieraśni pryniali jaho rapart na zvalnieńnie. A nieŭzabavie abviaścili padazravanym pa spravie ŭ abrazie pradstaŭnika ŭłady (art. 369 KK, karajecca hramadskimi pracami, abo štrafam, abo papraŭčymi rabotami na termin da dvuch hadoŭ, abo aryštam, ci abmiežavańniem voli na termin da troch hadoŭ) ź liku supracoŭnikaŭ pravaachoŭnych orhanaŭ.
U kastryčniku supracoŭniki ŭpraŭleńnia ŭłasnaj biaśpieki MUS zatrymali jaho niedaloka ad doma — za «niepadparadkavańnie» jon atrymaŭ 12 sutak aryštu. Pakarańnie adbyvaŭ u izalatary na Akreścina. Tam jaho źmiaścili ŭ karcar, umovy byli nadzvyčaj žorstkimi: łožak byŭ pryšpileny da ściany i dniom, i nočču, byŭ adziny stuł, na jakim jon siadzieŭ 12 sutak i praktyčna nie spaŭ. Advakatu Dźmitryj zmoh pieradać, što ŭ jaho apuchajuć nohi, u jaho cukrovy dyjabiet druhoha typu.
Paśla pieršaha administracyjnaha terminu Kułakoŭski na volu nie vyjšaŭ, jaho zatrymali znoŭ za «niepadparadkavańnie», na hety raz ŭčastkovamu milicyjanieru, i dali ŭžo 15 sutak aryštu. Častku druhoha terminu jon znoŭ pravioŭ u karcary ŭ tych samych umovach. Na znak pratestu Dźmitryj prahłynuŭ čatyry mietaličnyja pradmiety.
Siamja i abaronca zajavili, što ŭmovy, u jakich jon utrymlivajecca, možna rascanić jak katavańni.
Paśla taho, jak historyja źjaviłasia ŭ ŚMI, Kułakoŭskaha pieraviali ŭ zvyčajnuju kamieru. Z redakcyjaj Tut.by źviazalisia adrazu niekalki čałaviek, jakija siadzieli abo razam z Kułakoŭskim, abo ŭ susiednich kamierach, jany paćvierdzili, što dla jaho jak dla byłoha supracoŭnika milicyi naŭmysna stvarali nadzvyčaj žorstkija ŭmovy ŭtrymańnia.
Paśla adbyćcia 27 sutak administracyjnaha aryštu Dźmitryja vyzvalili. Na dniach jon sprabavaŭ pakinuć Biełaruś, miera strymańnia ŭ dačynieńni da jaho nie abirałasia, adnak jamu byŭ časova abmiežavany vyjezd za miežy krainy. Jak stała viadoma Tut.by, eks-milicyjanier byŭ zatrymany na miažy i dastaŭleny ŭ izalatar, užo pa kryminalnaj spravie (abraza pradstaŭnika ŭłady).
