Piatro i Marharyta Kiryk.

Piatro i Marharyta Kiryk.

Maskoŭski sud horada Minska ŭpieršyniu ŭ Biełarusi zadavoliŭ skarhu na pastanovu ab admovie va ŭzbudžeńni kryminalnaj spravy pa katavańniach u žniŭni. Sudździa Lidzija Cialica admianiła pastanovu śledčaha i nakiravała kopiju pastanovy ŭ Maskoŭski rajonny adździeł Śledčaha kamiteta dla praviadzieńnia dadatkovaj pravierki pa fakcie naniasieńnia cialesnych paškodžańniaŭ supracoŭnikami orhanaŭ unutranych spraŭ Piatru Kiryku, paviedamlajuć pravaabaroncy.

Minčuka Piatra Kiryka zatrymali 12 žniŭnia, kala 23.15, kali jon vychodziŭ ź siabram z aŭtobusa (pamiž stancyjami mietro Malinaŭka i Piatroŭščyna). Chłopcu było 16 hadoŭ (ciapier jamu spoŭniłasia 17), adnak heta nie spyniła AMAP va ŭžyvańni da jaho siły.

Pravierku pa zajavie ab pryčynieńni Piatru Kiryku cialesnych paškodžańniaŭ supracoŭnikami orhanaŭ unutranych spraŭ pravodzili ŭ Maskoŭskim rajonnym adździele Śledčaha kamiteta. Pa jaje vynikach pastanovaj śledčaha V. Ju. Bialkieviča va ŭzbudžeńni kryminalnaj spravy ŭ dačynieńni da supracoŭnikaŭ OUS pa č. 3 art. 426 Kryminalnaha kodeksa było admoŭlena ŭ suviazi z adsutnaściu va ŭčynku składu złačynstva. Śledčy zrabiŭ vysnovu, što «padčas praviadzieńnia pravierki jakich-niebudź adnaznačna traktavanych źviestak ab ździajśnieńni ŭ dačynieńni da Kiryka P. S. supraćpraŭnych dziejańniaŭ z boku supracoŭnikaŭ pravaachoŭnych orhanaŭ nie zdabyta».

Mama Piatra ličyć, što vysnovy śledčaha absalutna nieabhruntavanyja jak z faktyčnaha, tak i z pravavoha punktu hledžańnia i prama supiarečać abstavinam, jakija jaje syn vykłaŭ u chodzie pravierki.

U skarzie taksama skazana, što Piatro nie prymaŭ udziełu ŭ mierapryjemstvie, nie akazvaŭ supracivu, ale supracoŭniki ŭsio roŭna ŭžyli suprać jaho fizičnuju siłu i śpiecyjalnyja srodki. Sudova-miedycynskaja ekśpiertyza paćvierdziła cialesnyja paškodžańni ŭ maładoha čałavieka: šmatlikija siniaki i ranki, jakija mahli ŭtvarycca nie mienš čym ad 25 traŭmujučych uździejańniaŭ. Apisanyja Piatrom abstaviny vidavočna śviedčać ab niezakonnym užyvańni fizičnaj siły i śpiecyjalnych srodkaŭ supracoŭnikami orhanaŭ unutranych spraŭ.

Na pasiadžeńni Piatro Kiryk padtrymaŭ skarhu, ličyć svajo zatrymańnie niezakonnym. Jon nieadnarazova kazaŭ tym, chto źbivaŭ jaho, što jon niepaŭnaletni.

Advakat padtrymała skarhu, padrabiazna aśviatliła materyjały skarhi i vyniki pravierki. Adznačyła, što fakt pryciahnieńnia da adkaznaści pa art. 23. 34 nie vyzvalaje śledčaha ad pravierki metazhodnaści prymianieńnia śpiecsrodkaŭ. Prasiła ab admienie pastanovy i nakiravańni materyjałaŭ na dadatkovuju pravierku.

Prakuror padtrymaŭ admienu pastanovy, miarkuje jaje vyniasieńnie zaŭčasnym.

Analizujučy pastanovu, sud znajšoŭ jaje zaŭčasnaj i skazaŭ, što jana padlahaje admienie.

Клас
Панылы сорам
Ха-ха
Ого
Сумна
Абуральна