Biełaruskija mytniki spynili ŭvoz bujnoj partyi psichatropnych srodkaŭ: 182 kh psichatropaŭ mieli namier pieramiaścić praź biełaruska-polskuju miažu i schavać ich u pramysłovym vientylatary, paviedamlaje bresckaja mytnia.
Hruzavik MAN išoŭ ź Sierbii praz punkt propusku «Kazłovičy». 42-hadovy hramadzianin Sierbii, kiroŭca aŭtaciahnika, padaŭ da mytnaha afarmleńnia dakumienty na ŭvoz partyi pramysłovaha abstalavańnia.
Mytniki z pamiežnikami, praskanavaŭšy hruzavik śpiecyjalnym abstalavańniem, vyjavili ŭ hruzavym adsieku dadatkovy hruz.
Jak vynik, u pramysłovym vientylatary znajšli 89 palimiernych pakietaŭ z tabletkami i paraškom, a taksama dva palimiernyja miachi z rečyvam śvietła-karyčnievaha koleru. Słužbovy sabaka svajoj reakcyjaj pakazaŭ na mahčymuju najaŭnaść u ich zabaronienych rečyvaŭ.
Kamitet sudovych ekśpiertyz vyśvietliŭ, što pradmiety źjaŭlajucca asabliva niebiaśpiečnymi psichatropnymi rečyvami troch vidaŭ: MDMA, amfietamin i mietamfietamin.
Ahulnaja vaha kantrabandy — amal 182 kh: takoj kolkaści psichatropaŭ chapiła b bolš čym na 600 tysiač doz. A ahulny košt na čornym rynku dasiahaje bolš za 3,5 młn dalaraŭ.
Hramadzianina Sierbii ŭziali pad vartu, raspačali kryminalnuju spravu.