Administratar telehram-kanała «Biełaruś hałaŭnoha mozhu» i fryłansier-kansultant Radyjo Svaboda Ihar Łosik znachodzicca za kratami 188 dzion, z 25 červienia. Jon haładaje z 15 śniežnia, kali jamu vystavili novyja abvinavačańni — u padrychtoŭcy da ŭdziełu ŭ masavych biesparadkach, piša Radyjo Svaboda.
29 śniežnia Ihara ŭ SIZA Žodzina naviedaŭ advakat Dźmitryj Lepretar. Jon starajecca byvać u Ihara dvojčy na tydzień.
«Učora Ihar vyhladaŭ i adčuvaŭ siabie zadavalniajuča, — raskazaŭ Dźmitryj. — Pry sustrečach cikavicca pierš za ŭsio tym, što adbyvajecca ŭ siamji, jak dačka i žonka. Taksama pytajecca pra toje, što adbyvajecca ŭ krainie. Ihar vielmi ŭdziačny ŭsim, chto piša jamu listy i dasyłaje paštoŭki. Heta dapamahaje adciahnuć uvahu ad taho, što jaho trymajuć pad vartaj. Ihar starajecca adkazvać na ŭsie listy, jakija jamu dasyłajuć ludzi».
Ihar pakul nie źbirajecca spyniać haładoŭku. Jak raskazała Svabodzie jahonaja žonka Darja, Ihar nie skardzicca na zdaroŭje. Jaho štodnia ahladajuć turemnyja miedyki, vymiarajuć cisk. Składanaściaŭ z arhanizacyjaj vizitaŭ advakata niama.
