11 studzienia sud Kastryčnickaha rajona Viciebska pačaŭ razhladać kryminalnuju spravu 25-hadovaha viciablanina Arcioma Isakava, abvinavačanaha pavodle art. 364 KK («Hvałt abo pahroza ŭžyvańnia hvałtu ŭ dačynieńni supracoŭnika ŭnutranych spraŭ»). Raniej da administracyjnaj ci kryminalnaj adkaznaści Isakaŭ nie pryciahvaŭsia. Ciapier jamu pahražaje da 6 hadoŭ pazbaŭleńnia voli, paviedamlaje Viciebskaja viasna.
Spravu razhladaje sudździa Siarhiej Budrevič. Siarod udzielnikaŭ pracesu — dzieviać paciarpiełych milicyjantaŭ, jakija na pieršym pasiadžeńni davali svaje pakazańni. Na pačatak pracesu ŭsie achvotnyja nie trapili, u tym liku žurnalisty.
Arciom Isakaŭ byŭ zatrymany 25 kastryčnika ŭ miežach administracyjnaha razboru. Za parušeńnie zakonu ab masavych mierapryjemstvach jaho aštrafavali na 10 bazavych vieličyniaŭ. U miežach kryminalnaj spravy znachodzicca ŭ SIZA ad 28 kastryčnika.
Pavodle prakuratury, 25 kastryčnika Arciom Isakaŭ uziaŭ aktyŭny ŭdzieł u niesankcyjanavanym masavym šeści. Abvinavačańnie śćviardžaje, što Isakaŭ nie mienš dvuch razoŭ «raspyliŭ strumień piarcovaha hazu ŭ bok tvaraŭ i tułavaŭ milicyjantaŭ Vajciachoŭskaha, Ivanova, Siankieviča». Hetymi dziejańniami Isakaŭ, pavodle prakuratury, pieraškodziŭ milicyjantam zatrymać niećviarozaha hramadzianina, jaki vykrykvaŭ abraźlivyja słovy ŭ ich bok. Śćviardžajecca, što Isakaŭ taksama vykrykvaŭ niecenzurnyja słovy, pakazvaŭ siaredni palec levaj ruki, paśla čaho źbieh ź miesca złačynstva. Dziejańni Isakava byli kvalifikavanyja pavodle art. 364 KK — jak hvałt u dačynieńni supracoŭnikaŭ unutranych spraŭ z metaj pieraškody ich słužbovaj dziejnaści.
Paźniej, padčas svajho zatrymańnia ŭ rajonie vulicy Čkałava, Isakaŭ, pavodle abvinavačańnia, nie mienš troch razoŭ raspyliŭ piarcovy haz u bok milicyjantaŭ Anienkava, Dunca, Łazuki, Radkieviča, Ratnikava. Hetym nibyta pryčyniŭ fizičny bol supracoŭnikam milicyi (dziejańni kvalifikavanyja taksama pavodle art. 364 KK).
Arciom Isakaŭ pryznaŭ svaju vinu častkova.
U pieršy dzień sudovaha daśledavańnia sud pačaŭ apytvać paciarpiełych milicyjantaŭ. Usie jany paviedamili, što ŭ toj ci inšaj stupieni paciarpieli paśla raspyleńnia Isakavym piarcovaha hazu. U najbolšaj stupieni paciarpieŭ Mikałaj Vajciachoŭski, jaki, ź jahonych słoŭ, zmoh viarnucca da vykanańnia svaich abaviazkaŭ tolki praz chvilin 30-50. Kazaŭ, što haz jamu trapiŭ niepasredna ŭ tvar.
Paciarpiełyja milicyjanty 25 kastryčnika byli apranutyja ŭ cyvilnaje adzieńnie i vykonvali svaje słužbovyja abaviazki, znachodziačysia ŭ kałonie pratestoŭcaŭ. Pavodle supracoŭnikaŭ, jany mielisia spyniać supraćpraŭnyja dziejańni: kanfiskoŭvać niezarehistravanuju simvoliku ci zatrymlivać niećviarozych hramadzian.
Supracoŭniki MUS paviedamili ŭ sudzie, što ŭ dačynieńni da ich «hramadzianie byli nastrojenyja ahresiŭna, zaklikali pierachodzić na bok narodu, abražali kryŭdnymi słovami».