14 śniežnia 2020 hoda na płoščy Niezaležnaści zatrymali kala 80 čałaviek, jakija płanavali sabracca na Marš mudraści. Siarod ich była i 89-hadovaja Valeryja Śmirnova razam z dačkoj Ludmiłaj, jakoj 67 hadoŭ. U toj dzień jany ŭpieršyniu pabyvali ŭ RUUS, dzie praviali bolš za šeść hadzin. Paśla vyzvaleńnia jany raspaviadali:
— My išli pa płoščy Niezaležnaści, nikoha nie čapali, i tut, adkul ni vaźmisia, čornaja masa ŭ vielizarnaj kolkaści. Vyrvacca było niemahčyma. My ŭ adzin bok — jany tudy, my ŭ inšy bok — jany tam. Spačatku skazali, prajdzicie ŭ aŭtobus, my pravierym vašy źviestki i adpuścim, ale nas padmanuli. U aŭtobus nas litaralna zanieśli.
Siońnia, 12 studzienia, spravu Valeryi Śmirnovaj razhledzieli ŭ sudzie Leninskaha rajona. U mai žančynie spoŭnicca 90 hadoŭ. Upieršyniu ŭ žyćci jaje pryznali pravaparušalnicaj, raspaviadaje jaje praŭnučka Darja, jakaja prysutničała na pracesie.
Pa słovach Darji, prababulu abvinavacili va ŭdziele ŭ niesankcyjanavanym masavym mierapryjemstvie i ŭ tym, što taja vykrykvała «Žyvie Biełaruś!». Ananimny śviedka — supracoŭnik milicyi, jaki vystupiŭ u sudzie pa videasuviazi, — paćvierdziŭ heta. Sud vyrašyŭ, što Valeryja Śmirnova vinavataja i pryznačyŭ joj u jakaści pakarańnia štraf u 870 rubloŭ.
Rašeńniu suda, kaža Darja, prababula nie ździviłasia, choć i źniervavałasia.
— U niejki momant navat pakazalisia ślozy, ale heta była chvilinnaja słabaść. Paśla my pajechali ŭ kaviarniu, vypili kavu, źjeli pa pirožnym i, tak by mović, adśviatkavali, što dali štraf, a nie sutki, — kaža dziaŭčyna. — Ciapier prababula badzioraja i viasiołaja, usio ŭ paradku. Rašeńnie suda my płanujem abskardzić.
Zaŭtra, 13 studzienia, adbudziecca sud pa spravie babuli Darji — Ludmiły Bystrenka. Joj taksama inkryminujuć artykuł 23.34 KaAP za padziei 14 śniežnia.
