6 vieraśnia Cichan Klukač vyrašyŭ uziać udzieł u niadzielnym maršy razam sa svajoj dziaŭčynaj Safijaj Małaševič. Dziaržabvinavaŭca Krupickaja začytała, što Klukač i Małaševič ruchalisia pa prajeznaj častcy darohi, rabili hučnyja vopleski rukami, vykarystoŭvali apazicyjnuju simvoliku, išli ŭ pieršych šerahach kałony, tym samym ździejśnili złačynstva pa č. 1 art. 342 KK (karajecca štrafam, abo aryštam, abo abmiežavańniem voli na termin da troch hadoŭ, abo pazbaŭleńniem voli na toj ža termin). Infarmacyi pra ŭron transpartnym ci inšym kampanijam nie prahučała ŭ abvinavačvańni.
Fota Nadziei Bužan
Taksama Sofji i Cichanu pradjaŭlenaje abvinavačvańnie ŭ hrupavym chulihanstvie (č. 2 art. 339 KK, karajecca aryštam, abo abmiežavańniem voli na termin da troch hadoŭ, abo pazbaŭleńniem voli na termin ad adnaho hoda da šaści hadoŭ). U abvinavačvańni adznačana, što 6 vieraśnia maładyja ludzi nanieśli vulharnyja nadpisy na zaharadžalnych ščytach, jakija naležać vajskovaj čaści 63755 i byli vystaŭlenyja kala Pałaca niezaležnaści. Dziaržabvinavaŭca padkreśliła, što dziejničali abvinavačanyja z vyklučnym cynizmam, demanstravali pahardu da maralnych kaštoŭnaściaŭ hramadstva, vajskovaj čaści byŭ naniesieny ŭron na sumu 103 rubli. Safija jašče da suda kampiensavała ŭron.
Sofji Małaševič, akramia taho, vystavili abvinavačańnie ŭ abrazie Łukašenki (art. 368 KK, karajecca štrafam, abo papraŭčymi rabotami na termin da dvuch hadoŭ, abo aryštam, abo abmiežavańniem voli na termin da dvuch hadoŭ, abo pazbaŭleńniem voli na toj ža termin). Pa viersii śledstva, u žniŭni jana dvojčy demanstravała płakat z abraźlivym nadpisam, jaki źmiaščaje niehatyŭnuju acenku jaho dziejnaści, demanstrujučy sacyjalnuju nieciarplivaść da pradstaŭnikoŭ ułady i žadańnie pradstavić Łukašenka ŭ źniavažlivym stanoviščy ŭ vačach hramadskaści. U sudzie źmiest płakata nie ahałošvajecca, adznačajecca, što tam vykarystanyja niecenzurnyja słovy.
Cichan pryznaje vinu tolki va ŭdziele ŭ akcyi 6 vieraśnia, kaža, što nie rabiŭ nadpisaŭ, na śledstvie ŭziaŭ vinu na siabie, kab vyharadzić dziaŭčynu. Pa słovach Safii, jana brała ŭdzieł u akcyjach, kab vykazać svaju hramadzianskuju pazicyju nakont sacyjalnaj niespraviadlivaści — nizkich zarobkaŭ i piensij u Biełarusi. Kaža, jaje babula adpracavała 40 hod, maje dźvie vyšejšyja adukacyi, a ŭ miesiac atrymlivaje 400 rubloŭ, siadziełku joj nie dajuć, niahledziačy na invalidnaść i ciažkaje zachvorvańnie.
Cichan vykazvaŭ niazhodu z falsifikacyjaj vynikaŭ prezidenckich vybaraŭ, rastłumačyŭ jon. Abvinavačvanyja kažuć, što ŭśviedamlajuć, što ździejśnili, parušać zakon namieraŭ nie majuć. Pravaabaroncy pryznali Safiju i Cichana palitviaźniami.
Čytajcie taksama: Pamiatajecie dziaŭčynu, jakaja tančyła la «Rubiaža»? Jana raskazała, čamu znoŭ vychodzić na pratesty, choć joj pahražaje 6 hadoŭ
