Fota Commons.wikimedia.org by Foundations World Economic Forum — 20th Anniversary Schwab Foundation Gala Dinner.
Sinhapurskaje vydańnie mižnarodnaj dziełavoj haziety International Business Times piša, što ŭrad Kitaja choča nacyjanalizavać internet-hihanta Alibaba Group, kitajski anałah amierykanskaha Amazon i rasijskaha Wildberries, viadomaha ŭ nas pa sajcie Aliexpress. Nacyjanalizacyja pahražaje taksama źviazanaj z Alibaba finansavaj kampanii Ant Group, ułaśnicy najbujniejšaha ŭ Kitai servisu internet-płaciažoŭ Alipay, jakim karystajecca bolš za miljard čałaviek.
Abiedźvie firmy naležać Džeku Ma, jakoha Forbes letaś nazvaŭ samym bahatym čałaviekam u Kitai i 17-m samym bahatym u śviecie, z nabytkam pamieram 38,8 miljarda dalaraŭ.
Prablemy ŭ Ma pačalisia 3 listapada 2020 hoda, jakraz kali Ant Group mieŭ vyjści na IPO adnačasova na Šanchajskaj i Hankonhskaj biržach. Heta pavinna było stać najbolšym IPO u suśvietnaj historyi, čakałasia, što jano pryciahnie 35 miljardaŭ dalaraŭ. Ale za dva dni da tarhoŭ IPO raptam admianili z-za «istotnych źmianieńniaŭ u narmatyŭna-pravavoj bazie», nie paviedamiŭšy aficyjna nijakich dadatkovych detalaŭ. Nieaficyjna kitajskija čynoŭniki kazali, što schiema biznesu Ant Group zanadta ryzykoŭnaja i mahła b pryvieści da škodnych dla finansavaha rynku nastupstvaŭ. Heta, adnak, nie tłumačyć, čamu IPO admianili tak raptoŭna. Pavodle čutak, zahad spynić IPO addaŭ asabista staršynia KNR Si Czińpin, jakoha prahniaviła pramova Ma na ekanamičnym forumie ŭ Šanchai 24 kastryčnika, u jakoj miljarder navažyŭsia krytykavać ekanamičnuju palityku partyi.
Pavodle čutak, kali Ma paviedamili pra toje, što IPO nie adbudziecca, jon prapanavaŭ addać dziaržavie istotnuju častku akcyj Ant Group, kab zahładzić vinu pierad partyjaj. Partyja, adnak, nie pahadziłasia na častku i vyrašyła zabrać sabie ŭsio.
Sam Džek Ma pry hetym kudyści źnik. U apošni raz jaho bačyli ŭ kancy kastryčnika, na tym samym ekanamičnym forumie.
U žniŭni 2019 hoda kitajski miljarder Dua Vienhuj, jaki ŭciok u ZŠA, siarod inšaha, zajaviŭ, što Ant Group — zanadta paśpiachovaja kampanija, i Si Czińpin chutka adbiare jaje ŭ Džeka Ma, a sam Ma apyniecca abo ŭ turmie, abo ŭ mahile.
56-hadovy Džek Ma va ŭniviersitet pastupiŭ tolki z treciaj sproby. Jon taksama niekalki razoŭ sprabavaŭ pastupić u Harvardskuju biznes-škołu, ale jaho tak i nie ŭziali. Jon doŭha nie moh znajści pracu, pakul u 1995 jon nie adkryŭ dla siabie Internet i nie pačaŭ rabić pieršyja ŭ krainie anhłamoŭnyja sajty dla kitajskich kampanij. Za čatyry hady jon zarabiŭ svoj pieršy miljon dalaraŭ i zasnavaŭ kampaniju Alibaba, jakaja stała fienamienalnym pośpiecham. Aficyjna jon byŭ samym bahatyja kitajcam u śviecie i staŭ simvałam novaj kitajskaj pradprymalnaści.
