Ilustracyjnaje fota Nadziei Bužan
Suzasnavalnik fondu Jarasłaŭ Lichačeŭski patłumačyŭ «Našaj Nivie» situacyju.
Pieršy momant. Nasamreč u elektronnym košyku bitkojnaŭ było 10, a nie 19, bo ŭ błakčejna inšaja łohika, čym taja, jakoj my karystajemsia ŭ žyćci. Kab zrabić tranzakcyju, treba pieravieści adrazu niekalki błokaŭ z šyfravanaj infarmacyjaj. Kali suma bolšaja za patrebnuju, sietka viartaje reštu — asobnaj apieracyjaj.
Lichačeŭski pryvodzić taki prykład. Vy atrymali zarobak kupiuraj 100 rubloŭ, pašli ź joj u bar i patracili 20 rubloŭ. U schiemie błakčejna heta vyhladaje tak: +100 (pastupleńnie zarobku), +80 (rešta, jakuju vam vydali) i -100 (bo vy raźličylisia adnoj kupiuraj). Biaspłatnyja servisy, z dapamohaj jakich možna adsočvać pastupleńni kryptavaluty, nie zaŭsiody adnimajuć hetyja «lišnija» ruchi, tamu moža ŭźniknuć błytanina.
Druhi momant. Z 10 bitkojnaŭ pastupleńni ŭ fond — prykładna pałova. Da siaredziny vieraśnia hety elektronny kašalok vykarystoŭvaŭsia tolki dla vypłat. Achviaravańni ad biełarusaŭ prychodzili na rachunak u jeŭra, fond kuplaŭ na ich bitkojny i pieravodziŭ paciarpiełym. Tak było nabyta 5,5 bitkojna. Achviaravańni niepasredna tudy pačali pastupać paźniej — ahułam biełarusy pieraviali 4,5 bitkojna.
«Ich składana acanić u dalarach, bo kurs źmianiajecca kožny dzień. My niekalki razoŭ fiksavali kurs šlacham kanviertacyi — atrymałasia amal $94 tysiačy. Za košt taho, što bitkojn ros, u dalarach vyjšła bolšaja suma, čym achviaravali», — kaža Lichačeŭski.
Z hetych hrošaj na vypłaty paciarpiełym patracili $50 tysiač — ich uličyli ŭ listapadaŭskaj spravazdačy ŭ hrafie «Sponsarskija prahramy fondaŭ». Astatnija hrošy zachoŭvajucca na rachunku — tolki nie ŭ bitkojnach (kab nie zhubić ich u vypadku abvału kursa), a ŭ USDT (ličbavaja valuta, jakaja zaŭsiody roŭnaja dalaru).
Jak hetyja hrošy atrymlivajuć paciarpiełyja? Nieabchodnuju sumu im pieravodziać u bitkojnach na ich elektronny kašalok. Paśla hetyja hrošy možna vyvieści na biełaruskuju kartku.
Poŭnaja spravazdača pa fondzie, pa słovach Lichačeŭskaha, budzie hatova ŭ hetym miesiacy.
