Siarhiej Kačałaŭ 24 śniežnia źlapiŭ u siabie doma śniežnuju babu, upryhožyŭ jaje čyrvonym šalikam, napisaŭ na śniezie «Žyvie Biełaruś!».
Nazaŭtra śniehavik «paciok» i źnik, a ŭčastkovy skłaŭ pratakoł za «niesankcyjanavany pikiet». Spravu razhladała sudździa Tamara Zastaŭnieckaja.
Siarhiej žyvie ŭ Markavičach Homielskaha rajonu. Jamu 51 hod, maje invalidnaść treciaj hrupy. Jon zaŭsiody rabiŭ uzimku śniehavikoŭ, prychodzili susiedzi, fatahrafavalisia ź imi. Zrabiŭ śniehavika i 24 śniežnia — jak tolki vypaŭ śnieh, pryčapiŭ jamu čyrvony šalik, napisaŭ «Žyvie Biełaruś».
«Nu a što? Chiba nie žyvie Biełaruś? Čamu tak nielha pisać?» — zaŭvažyŭ Siarhiej. Kaža, što jahonaha śniehavika fatahrafavali susiedzi i ŭ tym liku «niekatoryja niecharošyja ludzi». «Padbiehła niejkaja maładaja dziaŭčyna — ja jaje nia viedaju. Źniała śniehavika i ŭciakła. Vidać, jana i daniesła ŭ milicyju», — zaznačyŭ Siarhiej. Učastkovy skłaŭ pratakoł za «niesankcyjanavany pikiet» pa artykule 23.34 KaAP.
«Ja palityčnych metaŭ nie vysoŭvaŭ, nie biehaŭ sa ściahami, ničoha nie kryčaŭ. Ja zrabiŭ śniehavika i napisaŭ «Žyvie Biełaruś», jak Kupała kazaŭ. Treba było musić napisać «Nie žyvie Biełaruś». My jak usie ludzi na śviecie… Tolki čamuści nas hniatuć!» — vykazaŭsia na sudzie viaskoviec.
«Ci byŭ bačny śniehavik z vulicy?» — pytałasia sudździa.
«Žonka daviedałasia, što tam biehajuć, kryčać — pajšła i ścierła nadpis i šalik čyrvony źniała», — dadaŭ Siarhiej.
Sudździa nakiravała materyjały spravy na dapracoŭku.
