Zdaryłasia ŭsio 4 kastryčnika.
Miedsiastra Julija Kašavierava.
«Pavodle danych śledstva, Julija išła ŭ piešaj kałonie pa horadzie razam ź inšymi ŭdzielnikami «niesankcyjanavanaha mierapryjemstva», jakija vystupali suprać vynikaŭ prezidenckich vybaraŭ, — paviedamlaŭ partał tut.by u repartažy z suda. —
Kala doma № 74 na Maskoŭskim praśpiekcie da pratestoŭcaŭ padjechała milicyja. Adnaho z mužčyn zatrymlivali. Udzielnikaŭ šeścia heta aburyła, jany sprabavali adbić adnadumca. U adkaz siłaviki ŭžyli haz z bałončyka.
Padčas sutyčki ź milicyjaj Kašavierava, jak śćviardžaje śledstva, paškodziła mikraaŭtobus Ford Transit, jaki naležyć UUS abłvykankama: «Udaryła pa im nahoj nie mienš za try razy, naniosšy ŭvahnutaść, a taksama kinuła ŭśled aŭtamabilu draŭlanuju pałku».
U toj ža dzień Juliju zatrymali, 7 kastryčnika byŭ sud pa 23.34 — ale pratakoł adpravili na dapracoŭku. Dziaŭčynu vypuścili.
Ale, jak vyśvietliłasia, nienadoŭha.
«20 kastryčnika da nas pryjšli, — raskazaŭ «Našaj Nivie» Siarhiej Ivanavič, baćka dziaŭčyny. — Doma byŭ pieratrus, Julu zabrali siłaviki. 22 kastryčnika — druhi raz pieratrus. Zabrali kampjutar, telefony, fłeški, Julinu vopratku. I z 20 kastryčnika Jula znachodzicca ŭ viciebskim SIZA №2».
Ciapier Juliju Kašavieravu abvinavačvajuć u złosnym chulihanstvie: heta ad 1 da 6 hadoŭ źniavoleńnia.
Na sudzie dziaržabvinavaŭca paviedamiŭ, što milicyi naniesienaja škoda na sumu 841 rubiel. Raniej, darečy, siłaviki paviedamlali ab 405 rublach škody, častka jaje abvinavačanaja ŭžo kampiensavała.
Akramia taho, pavodle danych śledstva, Julija sarvała miedycynskuju masku i formiennuju šapku z kamandzira źviana AMAPa Alaksieja Alchimoviča.
Pakul što ŭ pasiadžeńni pierapynak až da 4 lutaha. Julija pakazańniaŭ jašče nie davała.
«Letaś jana tolki skončyła viciebski miedycynski kaledž. U kancy lipienia ŭładkavałasia na pracu miedsiastroj 103 mabilnaj bryhady», — kaža baćka Julii.
7 kastryčnika byŭ toj sud pa 23.34, jaje adpuścili, na nastupny dzień jana vyjšła na pracu — tam adrazu prapanavali zvolnicca. Jula pahadziłasia, 9 kastryčnika jaje apieratyŭna zvolnili.
Ciapier na sudzie ja prysutničaŭ. Jula źmianiłasia, viadoma: blednaja, kašlaje», — kaža tata.
«Napeŭna, u lubym vypadku dačku pryznajuć vinavataj», — prahnazuje tata Julii.
Listy da Julii dachodzili, išli 8—10 dzion. Jana prosić pieradać padziaku ludziam, jakija dasyłali joj słovy padtrymki.
