Sudździa — Alena Žukovič. Dziaržabvinavaŭca — prakuror Nastaśsia Malika. Paciarpiełyja — kiroŭcy tralejbusnaha parka №4 Viktar Navadvorski, Andrej Aŭtuška, ślesar-elektryk tralejbusnaha parka №4 Siarhiej Lizhirda

Dźmitryj Dubkoŭ — 29-hadovy dalnabojščyk. U noč z 10 na 11 žniŭnia jon prysutničaŭ na akcyi pratestu kala stancyi mietro «Puškinskaja» ŭ Minsku. Jaho paprasili pieraharadzić darohu mašynaj, što jon i zrabiŭ. Jon znachodzicca pad vartaj z 15 žniŭnia, piša spring96.org.

26 studzienia śviedka Leanid Zaharodnikaŭ raspavioŭ, što ŭ tuju noč jaho stali razdražniać huki z vulicy, i jon vyjšaŭ pahladzieć. Na vulicy sihnalili mašyny, prajezd byŭ zabłakavany. Z boku praśpiekta Puškina čulisia vybuchi. Jon išoŭ dadomu ŭ bok Sierdziča, čas ad času spyniajučysia, kab źniać padziei na telefon. Jaho zacikaviŭ momant, kali da MAZa kinułasia hrupka chłapcoŭ. Ci byŭ siarod ich abvinavačany, jon skazać nie zmoh. Kali mašyna prajechała mima jaho, pačuŭ huk, padobny da DTZ, ubačyŭ, što nibyta łabavoje škło raźbitaje.

U hety momant adzin čałaviek vyjšaŭ z mašyny, zabraŭ adzieńnie i źnik u natoŭpie: Leanid nie čuŭ pahroz u jaho bok, ale było bačna, što jon napužany. Chłopcy stali kryčać, što ŭ ich jość klučy, pytalisia, chto moža sieść za styrno. Z natoŭpu stali kazać, što ŭ adnaho ź ich — nievysokaha, u kamuflažnaj vopratcy, z barsietkaj — jość pistalet: jon trymaŭ jaho stvołam u ziemlu. Ale nie pahražaŭ im, a niby kantralavaŭ zonu kala MAZ. 

Leanid nie bačyŭ momanta, kali chtości sieŭ za styrno, ale ŭpeŭnieny, što heta byŭ nieprafiesijanał: jon nieŭpeŭniena raźviarnuŭ mašynu ŭ bok AMAPa, ale nie moža skazać, ci byŭ heta Dubkoŭ. Śviedka padkreśliŭ, što jon vyklikaŭ milicyju, pa telefonie jamu skazali «Dobra», ale nichto nie pryjechaŭ.

28 studzienia adbylisia sprečki bakoŭ. Prakuror Nastaśsia Malika ličyć kvalifikacyju słušnaj. Jana ŭpeŭnienaja, što diejańni Dubkova niepravamiernyja, jon razumieŭ, što ŭdzielničaŭ u masavych biesparadkach, a kali pakidaŭ mašynu, ścior svaje adbitki palcaŭ: značyć, jaho dziejańni byli naŭmysnyja.

Złačynstva było ździejśniena hrupaj asobaŭ pa «raptoŭna ŭźnikłaj papiaredniaj zmovie». Nastaśsia Malikava paličyła vinu dakazanaj i paprasiła naznačyć Dźmitryju Dubkovu pakarańnie pa sukupnaści dvuch artykułaŭ — siem hadoŭ pazbaŭleńnia voli ŭ kałonii ŭzmocniennaha režymu. A taksama — zadavolić pazoŭ 21,861 r. u poŭnym abjomie.

Advakat ličyć kvalifikacyju niepravilnaj: nivodny paciarpieły nie bačyŭ hvałtu, pahroza hvałtu i papiaredniaja zmova nie dakazanyja. Apošniaje paćviardžaje toje, što kiroŭcu hukali z natoŭpu, papiaredniaje raźmierkavańnie rolaŭ adsutničaje. Vyklikaje sumnieŭ i kvalifikacyja złačynstva pa art. 293: abvinavačańnie nie dakazała masavyja biesparadki. Dźmitryj Dubkoŭ ničoha nie źniščyŭ, nie stvaryŭ nijakich pahroz, a stvareńnie pieraškodaŭ na darozie nie źjaŭlajecca kvalifikacyjnaj prykmietaj pa hetym artykule. Tamu advakat ličyć mahčymym pierakvalifikavać art. 293 na art. 342. Taksama abaronca ličyć, što pazoŭ nie padlahaje zadavalnieńniu. U pryvatnaści, u pazoŭ nie padlahajuć uklučeńniu tramvajnyja maršruty, jakija tam pieraličanyja. Advakat padkreśliŭ, što paciarpiełyja nie majuć pretenzij. U suviazi z hetymi faktami prosić pakarańnie, nie źviazanaje z pazbaŭleńniem voli.

Apošniaje słova palitviaźnia Dźmitryja Dubkova prahučyć 2 lutaha ŭ 10:30.

Клас
Панылы сорам
Ха-ха
Ого
Сумна
Абуральна