U 2012 hodzie jon trapiŭ u SIZA pa artykule «Dapamoha va ŭchileńni ad spłaty padatkaŭ». U 2014 hodzie byŭ asudžany da 7 hadoŭ źniavoleńnia ŭ kałonii ŭzmocnienaha režymu. Pazaletaś Kacarenka vyjšaŭ na volu. A ciapier uznačalvaje pravaabarončuju kamisiju Kruhłaha stała demakratyčnych sił Juryja Vaskrasienskaha.
Uładzisłaŭ Kacarenka. Fota Nadziei Bužan.
Mienavita pad kiraŭnictvam Kacarenki byŭ raspracavany śpis 213 čałaviek, jakich pieraśledujuć pa palityčnych matyvach, i jakich KSDS prosić va Usiebiełaruskaha schodu amnistavać. «NN» parazmaŭlała z Uładzisłavam Kacarenkam pra niuansy składańnia hetaha śpisu.
«Ad Cichanoŭskaj i Łatuški adkazaŭ niama»
«My dasłali listy Cichanoŭskaj, Łatušku, Kavalkovaj z pytańniem, ci nie suprać jany taho, kab ich taksama uklučyli ŭ hety śpis?
Kali vy bačyli pieršuju pres-kanfierencyju Kaardynacyjnaj rady 14 žniŭnia, to mienavita Volha Kavalkova, mabyć, pa nierazumieńni, skazała, što zadačaj KS źjaŭlajecca pieradača im ułady. Heta i stała tryhieram dla Śledčaha kamiteta, kab zavieści kryminalnuju spravu pa zachopie ŭłady. Kali b Kavalkova hetaha nie kazała, to ŭ śledčych orhanaŭ nie było b padstaŭ zavodzić spravu.
Cichanoŭskaja taksama nazyvała nas samazvancami, ale ž ludzi ŭdzielničali ŭ vybarčaj kampanii na roznych etapach. U ofisie na Charužaj było volnaje pamiaškańnie, my jaho źniali. Naša meta — nie dać raścisnuć kančatkova tyja stvaralnyja momanty, jakija abjadnali hramadzian. Lidary pakinuli Biełaruś — ja nie kažu, što jany praz heta kiepskija ludzi, u ich byli na toje pryčyny, niebiaśpieki. Cichanoŭskuju ŭvohule prosta vyvieźli.
U nas niama da ich nijakaha niehatyvu, a čamu jany na nas vylivajuć niehatyŭ — heta inšaje pytańnie. Kab nie było pytańniaŭ, čamu my ŭklučyli ich bieź viedama, my dasłali kožnamu pytańnie. Pakul nam nichto nie adkazaŭ. Kali niechta adkaža, tady ŭklučym».
«U Jemialjanava čystaja chulihanka»
«U śpisie niama anarchista Mikity Jemialjanava. U jaho čystaja chulihanka, jon kinuŭ lampačku z zapalnaj sumieśsiu ŭ Minski haradski sud. Kali Ivan Komar prosta stajaŭ zboku, to Jemialjanaŭ ździajśniaŭ akt. Tamu pieršy jość u śpisie, a druhoha niama».
Ci dajšoŭ Dziadok da vyvučeńnia anarcha-mistycyzmu?
«Taksama niama ŭ śpisie Mikoły Dziadka, jaho aryštavali za viadzieńnie telehram-kanała. Kali, skažam, na aŭtara «Biełarusi hałaŭnoha mozha» [Ihara Łosika] niama ničoha, aproč taho, što jon pretencyjozna vioŭ kanał, to Dziadok zaklikaŭ da roznych akcyj. Praz heta my vyklučyli. Kali budzie sud i akažacca, što my pamylajemsia, to abaviazkova ŭklučym.
U nas niama padziełu — anarchist ty ci nie anarchist. Kali ja siadzieŭ dva hady ŭ SIZA KDB, to čytaŭ tam vydatnuju knihu «KDB suprać pałterhiejstu» — heta navukovaja praca, u asnoŭnym pra HPU i NKVD, jak u 30-ja hady imi źniščałasia apazicyja. I samy prahresiŭny ruch 20-ch hadoŭ byli anarcha-mistyki — heta adno z adhalinavańniaŭ kamunistyčnaha vučeńnia. Ja sumniavajusia, što Dziadok i inšyja chłopcy, što chodziać z čornymi ściahami, čytali Bakunina ci Krapotkina, dajšli da vyvučeńnia anarcha-mistycyzmu.
Śviet, kaniečnie, choča iści pa decentralizacyi kiravańnia, da šmatpalarnaha śvietu, ale kožny robić svaju dziaržavu bolš mocnaj, kab hetych polusaŭ było mienš. Voś takaja supiarečnaść. Anarchizm kiepski tym, što jany mohuć być ščaślivymi tolki tady, kali nad imi niama nijakaj ułady. U nas narmalnaje staŭleńnie da anarchistaŭ, ale im treba brać zdarovy anarchizm ad Bakunina».
Čamu sam Kacarenka ŭ śpisie?
«U nas śpis atrymaŭsia bolš šyroki, čym ahulny śpis palitviaźniaŭ. Tut i ludzi, na jakich zaviedzienaja kryminalnaja sprava ci nie vykanana pakarańnie, tut i ludzi pa chatnim aryštam, ci pad padpiskaj — heta, naprykład, Juryj Vaskrasienski, Lilija Ułasava, Illa Salej.
Ja jość u hetym śpisie, bo ŭ mianie ŭ spravie prysutničaje palityčny matyŭ. U mianie tak i nie było spraviadlivaha suda. Byŭ adziny sud u 2014 hodzie, dzie sudździa chacieła mianie apraŭdać, ale jaje vyklikaŭ staršynia suda, skazaŭšy, što voś hetamu 7 hadoŭ, astatnim — jak chočaš. U dokazach było napisana: «Kacarenka moh źjaŭlacca lidaram arhanizavanaj złačynnaj hrupy praz asabistyja jakaści». Kropka. Heta ŭsie dokazy!
U mianie nie vykanana dadatkovaje pakarańnie ŭ vyhladzie zabarony na zajmańnie kiraŭničych pasad da 2024 hoda. Ad mianie tołku nijakaha, kali ja pajdu achoŭnikam u mietro, ale kiraŭnikom być ja nie mahu, tamu ja ŭvajšoŭ u hety śpis».
«Jak možna sadžać za sadranuju bałakłavu?»
«U Jeŭropie, navat kali ty paŭdzielničaŭ u pratestach i paraniŭ palicejskaha, to bolš za 3 hady nikoli nie atrymaješ. Sprava ŭ tym, što ŭ Jeŭropie palicejski, kali idzie na pracu, viedaje pra ryzyki svajoj prafiesii, za heta jamu płaciacca dadatkovyja hrošy. Hetak jak u nas płaciać amapaŭcam, jakija vychodziać u vychadnyja. Prabačcie, heta śmiešna kazać, kali z amapaŭca sadrali bałakłavu i padrapali tvar ci ŭ inšaha vybili z ruk racyju — i za heta ludziej sadžajuć. Spadarstva, adumajciesia! Dzie humanizm? Kaliści ž na hetym miescy možacie apynucca vy sami. Tak nielha rabić».
«U Aŭtuchoviča niezdarovaja ahresija»
«Kali my ŭniasiom u śpis Aŭtuchoviča, to ŭzrovień hvałtu moža nie źmienšycca. Aŭtuchovič — heta nie palityčnaja, a partyzanska-padryŭnaja dziejnaść. Usio, što źviazana z hvałtam, niamožna padtrymlivać. Kali ja pasiadzieŭ z šmatlikimi ludźmi, to razumieju, što prachodzić miž radkoŭ. Davajcie raźbiaromsia: u Aŭtuchoviča była firma, što akazvała transpartnyja pasłuhi, potym u jaho hety biznes prapaŭ. Čałaviek abaźliŭsia i sieŭ. Nazvać jaho palityčnym viaźniem nielha, jon ža chacieŭ zastrelić hubiernatara (hetaje abvinavačańnie nie paćvierdziłasia i było źniataje — «NN»). U jaho ahresija dachodziła da niezdarovych pamieraŭ. Ja ŭnutrana razumieju takich ludziej, ale davajcie pačakajem suda, pahladzim, ci jość tam dokazy, ci ŭsio pryciahnuta za vušy. Moža, akažacca mifičnaje stvareńnie arhanizavanaj złačynnaj hrupoŭki, jak u Juryja Vaskrasienskaha, kali pakazvali ŭ jaho humovuju hranatu i aŭtamat dla strajkboła.
Elemienty sadyzmu
«Nam napisała žančyna, muž jakoj 27 vieraśnia vyjšaŭ z domu, u dzień kali adbyvałasia akcyja. Ničoha kiepskaha nie chacieŭ zrabić, ale ŭ jaho dva kaktejli Mołatava znajšli. Ja nie asudžaju ludziej vielmi mocna, moža, niechta tolki dumaŭ, ale b tak i nie rašyŭsia. Kali ničoha nie adbyłosia, to nie treba karać mocna.
Ale kali jon zrabiŭ kaktejli Mołatava, to jon nie išoŭ na mirny pratest ź bieł-čyrvona-biełym ściaham, jak maje siabry z Tavarystva volnych spartsmienaŭ. Za što ich sadžali? Asabliva dziaŭčyn — Leŭčanka i Chižynkovu. Za što ich tak suvora karali? Heta ŭžo niejki elemient sadyzmu».
Chto jašče?
«U nas u śpisie jość Maksim Tužyk — hety čałaviek u natoŭpie vybiŭ z ruk milicyjaniera telefon. Jamu pryšyli chulihanku i dali try hady. Kali čałaviek dziejničaje ŭ natoŭpie i nie mieŭ žadańnia nanosić traŭmy milicyjanieraŭ, to my ŭnosim jaho ŭ śpis.
My ŭklučyli ŭ śpis dvuch siabroŭ Babaryki, u jakich znajšli hrošy. Heta ŭsio vielmi sumniŭna. Palityčny składnik tam prysutničaŭ. Asob z «Biełhazprambanka», jakija pryznali svaju vinu, my nie ŭklučali. Kali na sudzie jany skažuć, što heta było pad ciskam, tady inšaja situacyja».
