Fota SK
Usiaho pa «karahodnaj spravie» prachodziać kala 50 fihurantaŭ. Ich abvinavačvajuć abo padazrajuć u aktyŭnym udziele ŭ hrupavych dziejańniach, jakija hruba parušajuć hramadski paradak, što paciahnuła parušeńnie pracy transpartu, pradpryjemstvaŭ i arhanizacyj.
Sudziać abvinavačanych hrupami pa 10 čałaviek. Sud pa pieršaj «dziasiatcy» padychodzić da kanca, pa druhoj — pačniecca na nastupnym tydni.
11 lutaha prajšli sprečki bakoŭ. Abvinavačvańnie paličyła vinu pieršych dziesiaci čałaviek dakazanaj i adznačyła, što tolki dvoje całkam pryznali svaju vinu: 25-hadovaja nastaŭnica zamiežnych moŭ Maryna Hłazava i 20-hadovaja studentka treciaha kursa fiłfaka BDU Maryna Sirecan. Im prakuror paprasiŭ pryznačyć chatniuju chimiju: pieršaj — paŭtara hoda, druhi — hod i try miesiacy. Pry hetym Marynie Hłazavaj zaličycca ŭ termin vykanańnia pakarańnia čas, jaki jana prabyła pad vartaj i chatnim aryštam.
Paŭtara hoda chatniaj chimii abvinavačańnie zapytała i dla Jarasłava Jarašuka.
Dla Fiedarenki, Kaŭpačyka, Jakubuka, Dzienisienki, Litvina prakuror patrabuje paŭtara hoda «chimii» - z nakiravańniem u papraŭčuju ŭstanovu adkrytaha typu.
Dva hady «chimii» prakuror paprasiŭ dla Maksima Žarava, jaki raniej byŭ sudzimy za chulihanstva. Da hetaha pakarańnia abvinavačvańnie ličyć nieabchodnym dadać i 505 rubloŭ niepahašanaha pa starym prysudzie štrafu. Tyja ž dva hady z nakiravańniem u PUAT zapytali i dla Vadzima Varanoviča, jaki raniej da kryminalnaj adkaznaści nie pryciahvaŭsia, maje na ŭtrymańni małaletniaje dzicia, ale nie kampiensavaŭ pradjaŭlenuju škodu.
«Jany byli, moža być, upieršyniu ŭ žyćci absalutna volnyja i tamu ščaślivyja»
Prapanavanyja bokam abvinavačvańnia terminy ŭ niekatorych prysutnych na sudzie vyklikali ździŭleńnie.
Mikałaj Fiedarenka paličyŭ, što paŭtara hoda «chimii» — heta zanadta stroha:
— Niaŭžo praz 20 chvilin na hetym skryžavańni ja staŭ dla hramadstva takim niebiaśpiečnym čałaviekam, što mnie treba abmiažoŭvać svabodu?
Advakat Vitala Litvina paprasiŭ apraŭdać jaho padabaronnaha ŭ suviazi z adsutnaściu ŭ jaho dziejańniach składu złačynstva. Jon ličyć, što Vital nie ździajśniaŭ naŭmysnych aktyŭnych dziejańniaŭ, nakiravanych na hrubaje parušeńnie hramadskaha paradku. Abaronca taksama nahadaŭ, što raniej za karahod jaho ŭžo sudzili pavodle artykuła 23.34 KaAP.
— Padčas prahladu videazapisaŭ u sudzie ja mižvoli zirnuŭ u zału. I zaŭvažyŭ, što ŭ mnohich ludziej — abvinavačanych i nie tolki — bliščeli vočy, a niekatoryja navat u takt hučała muzycy niaśmieła prytopvali nahoj. Jany ŭspaminali nie toje, što, «znachodziačysia ŭ toj čas i ŭ tym miescy, vykazvali niejki pratest abo raźličvali na niejki efiekt» — a toje, što jany byli, moža być, upieršyniu ŭ žyćci absalutna svabodnyja i tamu ščaślivyja, — reziumavaŭ abaronca Litvina pad apładysmienty z zały.
U sudzie pa «karahodnaj spravie» abviaścili pierapynak na abied. Paśla paŭzy sprečki adnoviacca. Zatym abvinavačanyja zmohuć vystupić z apošnim słovam.
