Panamarova — byłaja advakatka, ciapier na piensii.
«Heta było 26 kastryčnika. U fejsbuku byŭ niejki post sa zdymkam maładoha chłopca ŭ šortach, było napisana, što heta nibyta amapaviec i była jaho charaktarystyka.
Pad dopisam 112 kamientaroŭ, adzin ź ich — moj. Ja napisała: «Zastrelsia, s***», — raskazvaje Śviatłana «Našaj Nivie». — A 12 listapada da mianie pryjšli. Ja žyvu adna i raptam baču, jak 6 mužykoŭ zachodziać u dvor. Padumała spačatku, što, moža, sacyjalnyja słužby praviarajuć adzinokich.
A ja jakraz kocikaŭ karmiła, rubiła im kurynyja hałovy. Nu i vyjšła ź siakierkaj z doma niejak aŭtamatyčna. Tyja mužyki ŭciakli za varoty adrazu, kažuć: treba pahavaryć, ale schavajcie siakieru. Ja kažu: oj, vas šaściora maładych, a vy baiciesia staruju babu ź siakieraj!»
Ale puściła ich u chatu. Zajšli, davaj mnie paśviedčańniami ŭ nos tykać».
Pa słovach Śviatłany, da jaje pryjechali dvoje supracoŭnikaŭ adździeła ŭłasnaj biaśpieki MUS.
«Dvoje ź Minska z UUB, dvoje niejkich miascovych milicyjantaŭ i dvaich ź miascovaj vučelni jany ŭziali paniatymi.
Pakazali sankcyju prakurora vobłaści: ahledzieć pamiaškańnie i zabrać pryładu, ź jakoj ja napisała toj kamientar. Addała im telefon, a jany kažuć: budziem pravodzić pieratrus. Ja kažu: chłopcy, tut ža napisana «ahlad pamiaškańnia». Ja juryst i pracavała advakatam, pieratrus ad ahladu mahu adroźnić».
«Hości» praviali ahlad.
«Adzin z hetych minskich byŭ adekvatny, a druhi mnie kaža: vy polski špijon!
Ja adkazvaju: Dy vy što? I hrošy atrymlivaju? — paśmichajecca Śviatłana. — Paśla jany adpuścili našych kleckich milicyjantaŭ, adpuścili i paniatych. I kažuć mnie: skažycie, što vy raskajvajeciesia ŭ tym, što abrazili i prosicie prabačeńnia. Ja kažu: nie, bo ja jaho nie źnievažała. I jakaja tam moža być abraza pry vykanańni słužbovych abaviazkaŭ, kali na fota, pad jakim kamientar, čałaviek staić u šortach kala rečki?»
U vyniku Panamarova pryznała, što napisała kamient, ale adznačyła, što namieru kahości abrazić u jaje nie było. A 29 śniežnia joj pazvanili z kleckaha SK i paviedamili: zaviedzienaja kryminalnaja sprava. Paciarpiełym pryznali taho amapaŭca z fota.
Ranicaj 31 śniežnia Panamarova była na dopycie ŭ SK.
«U zaklučeńni ekśpierta napisana, što maje słovy — heta «niehatyŭnaja adznaka asoby» taho amapaŭca», — kaža Śviatłana.
Ciapier sprava ŭ prakurora. Panamarova napisała chadajnictva ab spynieńni kryminalnaj spravy. Joj admovili.
Žančynu čakaje sud. Pakarać za abrazu mohuć štrafam, aryštam, hramadskimi pracami ci abmiežavańniem voli — chimijaj.
«Ja piensijanier, mnie dać hramadskija pracy nielha. Mohuć dać aryšt, štraf ci abmiežavańnie voli pa miescy žycharstva. Hladžu, što pa takich spravach dajuć abmiežavańnie voli ŭ asnoŭnym. Nu budu skardzicca, a što rabić?» — kaža Śviatłana Panamarova.
