Dni isnavańnia kramaŭ «Bihz» (kampanija «Banijar») paličanyja. Krynicy ŭ biznes-kołach paviedamili «Našaj Nivie», što sietka zakryvajecca.
«U historyi z «Bihzam» niama palityki. Banalnaje bankructva praz daŭhi, arendu i ahulnuju nieefiektyŭnaść», — skazali abaznanyja ludzi sa śfiery handlu.
Čytajcie. «Kampaniju my vyrazajem»: zatrymany ŭłaśnik kramaŭ «Hryn» i HC «Skała» Hienadź Kirejkaŭ
U sietku «Bihza» da niadaŭniaha času ŭvachodzili siem abjektaŭ. Heta hipiermarkiet na «Ekspabiele» (pieršy hipiermarkiet Biełarusi, adkryty ŭ 2005 hodzie), supiermarkiet u handlovym centry Palazzo, kruhłasutkavyja kramy na Łahojskim trakcie, praśpiektach Dziaržynskaha i Mašerava, vulicy Kalvaryjskaj, a taksama mini-markiet na vulicy Žudro.
Kramy na Mašerava i Žudro ŭžo zakrytyja, u niekatorych inšych pakupniki bačać paŭpustyja palicy i reštu tavaru.
Udzielniki rynka miarkujuć, što niekalki kramaŭ zabiaruć sabie «Susiedzi», astatnija adyduć «Jeŭraoptu». A voś hipiermarkiet «padvis» i pakul nie maje pakupnika.
Taksama niezrazumieła, što budzie z daŭhami.
«U «Bihza» była istotnaja pamyłka ŭ pazicyjanavańni, važnym dla rytejła. Jany siabie nijak nie pazicyjanavali — nie zrazumieła było, tannyja jany ci darahija, što ŭnikalnaha pradajuć? Voś narod da ich i nie pajšoŭ», — ličyć analityk sa śfiery.
Haspadarami kampanii ličylisia Natalla Łukomskaja (30%), Alaŭcina Łukomskaja (23%) i Barys Łukomski (10%). Niekatoryja ź ich znachodziacca za miažoj. Karespandent «Našaj Nivy» nie zmoh źviazacca ź imi, kab atrymać apieratyŭny kamientar.
