«Prikarpatzachidtrans» ekspłuatuje ŭčastak naftapraduktapravoda «Samara — Zachodni kirunak» praciahłaściu kala 800 km. Jon pryznačany dla prapampoŭki dyzielnaha paliva z Rasii i Biełarusi dla Ukrainy i tranzitu ŭ Jeŭropu.

Zhodna z ukrainskim zakanadaŭstvam, padsankcyjnyja i aryštavanyja kampanii i ichnaja majomaść pieradajucca ŭ kiravańnie ARMA — Nacyjanalnamu ahienctvu Ŭkrainy ŭ pytańniach znachodžańnia, vyšuku i kiravańnia aktyvami, atrymanymi ad karupcyjnych i inšych złačynstvaŭ. Ale datyčna kampanii «Prikarpatzachidtrans» jość niuansy.

Jak paviedamiŭ Svabodzie namieśnik staršyni ARMA Ŭładzimir Paŭlenka, ahienctva pakul nie atrymała nivodnych dakumentaŭ ab pieradačy ŭ kiravańnie majomaści kampanii «Prikarpatzachidtrans».

«Maje być sudovaje rašeńnie. Pakul što takija dakumenty nie pieradavalisia, ale nam mohuć pieradać usio što zaŭhodna. U sud pa hetym pytańni maje źviarnucca prakuratura», — skazaŭ Uładzimir Paŭlenka.

Aproč taho, pavodle pradstaŭnika ARMA, Mikałaj Varabiej moža zachavać za saboj prava kiravańnia kampanijaj:

«Heta datyčyć lubych asobaŭ, čyje aktyvy byli ci buduć pieradadzienyja ARMA. Luby čałaviek moža pryjści i ŭziać udzieł u našym konkursie, jaki abviaščajecca na pošuk asoby, jakaja budzie kiravać aryštavanymi aktyvami. Heta aznačaje, što navat ułaśnik moža časova zajści ŭ kiravańnie. Chiba tolki kali sud ŭ svaim rašeńni praduhledzić zabaronu ŭłaśniku kiravać i karystacca aktyvami», — udakładniŭ Uładzimir Paŭlenka.

Adnak, navat u vypadku sudovaj zabarony Mikałaj Varabiej zmoža asprečyć jaje ŭ sudovym paradku. U rašeńni Rady nacyjanalnaj biaśpieki i abarony, zaćvierdžanym ukazam prezydenta Ŭkrainy, u śpisie asobaŭ, suprać jakich uvodziacca sankcyi, proźvišča biełaruskaha biznesoŭca adsutničaje.

«ARMA — heta nie pravaachoŭny orhan, my nie advakaty i nia sudździ. My prosta vykonvajem toje, što nam pieradajuć. Tamu jakim čynam hety hramadzianin źviazany ci nie źviazany (z sankcyjami — RS), i jakim čynam abaraniać jahonyja pravy jak investara — heta nia tyja pytańni, za jakija my adkazvajem», — padkreśliŭ Uładzimir Paŭlenka.

U toj ža čas namieśnik kiraŭnika ARMA dadaŭ, što isnuje i takaja praktyka, kali aktyvy aryštoŭvajuć, ale nie pieradajuć u kiravańnie ahienctvu.

Što kažuć u samoj kampanii

U kampanii «Prikarpatzachidtrans» ličać biespadstaŭnym rašeńnie Rady nacbiaśpieki i abarony Ŭkrainy.

«Lozunh 1917 hoda «zabiary i padziali» znoŭ nabiraje papularnaść. Naściarožvajuć zajavy vysokapastaŭlenych čynoŭnikaŭ pra «dziŭnyja sudovyja rašeńni», jakija možna nie vykonvać. Pazasudovaje pazbaŭleńnie prava pryvatnaj ułasnaści stanovicca štodzionnaj praktykaj u našaj dziaržavie», — adznačajecca ŭ zajavie kampanii.

U dakumencie padkreślili, što kampanija źjaŭlajecca «sacyjalna aryjentavanym pradpryjemstvam z prazrystaj dziejnaściu i strukturaj ułasnaści», u jakim pracuje 600 supracoŭnikaŭ.

Kampanija zajaviła, što jaje «zakonnyja ŭłaśniki buduć vykarystoŭvać usie dastupnyja srodki dla abarony pradpryjemstva ad rejderskaha zachopu pad lozunham nacyjanalizacyi».

Pavodle infarmacyi Svabody, transpartavańnie naftapraduktaŭ pa trubapravodzie spynienaje z 15 lutaha.

Čytajcie taksama:
Ukraina adbiraje naftapraduktapravod u biełaruskaha multymiljaniera

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?