Fota Depositphotos.com
Pieršapačatkova było składana rabić vysnovy nakont taho, nakolki hetyja dadatki efiektyŭnyja, tamu što bolšaść ź ich, zhodna z praviłami kanfidencyjnaści, abmiažoŭvaje kolkaść źviestak, jakija mohuć źbiracca z karystalnika. Adnak apošnija daśledavańni vyjavili efiektyŭnaść takich prahram.
Dadatki ŭstaloŭvajucca na smartfony, a zatym Bluetooth adsočvaje, kali jaho karystalniki znachodziacca na adlehłaści mienš za 2 mietry na praciahu bolš za 15 chvilin. Potym karystalniki dadatku atrymlivajuć paviedamleńnie, kali niechta, z kim jany ŭstupali ŭ kantakt, maje stanoŭčy test na kavid. Heta spryjaie praduchileńniu infiekcyi, bo karystalnik moža ŭ takim vypadku pajści na karancin ci zrabić test.
9 lutaha brytanskija daśledčyki apublikavali vyniki pracy dadatku ad Nacyjanalnaj słužby achovy zdaroŭja (NHS), što ŭ Vialikabrytanii. Zhodna z publikacyjaj, dadatak vyjaŭlaje ŭdvaja bolš tych, z kim kantaktavaŭ infikavany, čym heta mahčyma zrabić praz apytańnie i inšyja tradycyjnyja mietady, paviedamlaje vydańnie Nature.
Daśledčyki padličyli, što ŭ pieryjad pamiž kastryčnikam i śniežniem minułaha hoda dadatak, vierahodna, dapamoh praduchilić bolš za 224 tysiačy zaražeńniaŭ. Padobnyja prahramy pakazali dobry vynik i ŭ inšych krainach, naprykład u Ispanii i Šviejcaryi.
Adnak navukoŭcy znajšli pieraškody dla efiektyŭnaj pracy dadatkaŭ, siarod jakich niedaskanałaje ŭzajemadziejańnie prahramy ź miascovaj sistemaj achovy zdaroŭja. Naprykład, u Šviejcaryi karystalniki prahramy SwissCovid, u jakich byŭ vyjaŭleny kavid, atrymlivajuć ad miedrabotnika kod, jaki jany pavinny ŭvieści ŭ prahramu, kab papiaredzić pra kavid svaich blizkich kantaktaŭ. Padčas druhoj chvali pandemii ŭ kancy 2020 hoda daktary mieli nie tak šmat času, kab zajmacca hienieracyjaj hetych kodaŭ.
Džaanna Miejzeł, biołah z Aryzonskaha ŭniviersiteta, ličyć, što pracu padobnych dadatkaŭ možna palepšyć, kali jany buduć vyličvać ryzyku mahčymaha zaražeńnia. Pa jaje mierkavańni, hetuju ryzyku možna vyznačać praz toje, nakolki lohka pieradajecca toj ci inšy štam kavidu, jaki vyjaŭleny ŭ čałavieka, a taksama praz toje, dzie adbyłosia patencyjnaje zaražeńnie — na vulicy ci ŭ pamiaškańni.
