Fota Paŭła Karalova
Adbyłosia heta ŭ parku Marata Kazieja, dzie ciapier idzie rekanstrukcyja inžyniernych kamunikacyj. Pakolki Pavieł pracuje niepadalok, to časta byvaje tam. Prahladaje ziamlu — raptam budaŭniki prapuścili štości kaštoŭnaje. I ŭžo nie raz znachodziŭ cikavinki: naprykład, darevalucyjny posud kanca XIX — pačatku XX stahoddzia.
«Škada mnie, što pradmiety staražytnaści časta patraplajuć u kuzavy mašyny i vyvoziacca na budaŭničyja placoŭki abo na śmieccie, — kaža jon. — Nałaziŭšysia, nachadziŭšysia, źviarnuŭ uvahu na niešta žoŭtaje ŭ ziamli. Padumaŭ, što saviecki piatak. Pryhledzieŭsia, akazałasia załataja manieta z profilem Mikałaja II. Zatym jašče adna, jašče…»
Historyk patelefanaŭ archieołahu Siarhieju Dziarnoviču, adkaznamu za nahlad na hetaj terytoryi, i spyniŭ budaŭničyja pracy.
«Heta prosta było. Mianie tam užo ludzi viedajuć. Byvaje, jany sami niekatoryja rečy nam pieradajuć», — zaŭvažaje Pavieł.
U ziamli jon znajšoŭ 16 maniet, piarścionak, łancuh i zubnuju karonku na čatyry zuby. Kali prybyła dapamoha ź mietałašukalnikam, dadałasia jašče 8 maniet. Pobač byŭ kavałak tkaniny ci skury. Vierahodna, u jaho byŭ zahornuty skarb. Kali ekskavatar rabiŭ tranšeju, vuzielčyk i raschinuŭsia.
Znachodku pieradali ŭ Instytut historyi Akademii navuk. Akazałasia, usie maniety — załatyja, časoŭ Mikałaja II i vydatnaj zachavanaści.
«Ja nie zvykły da skarbaŭ — bolš zvykły ratavać padmurki. Naprykład, hod tamu ŭdałosia zachavać padmurki damoŭ Łuckievičaŭ. Ich zaŭvažyli padčas budaŭničych prac u parku Janki Kupały. Na hetym miescy musiła prajści niekalki tranšej. Ja pisaŭ listy, kab padmurki nie čapali, i ŭ vyniku ich udałosia adstajać», — zhadvaje supracoŭnik muzieja.
Za addadzieny dziaržavie skarb Paŭłu musiać vypłacić uznaharodu — 25% ad koštu znachodki. Acenka, pa jaho słovach, zajmaje niekalki tydniaŭ. Hetyja hrošy Pavieł chacieŭ by nakiravać na histaryčnyja vystavy.
U jaki muziej patrapiać maniety, pakul nieviadoma. Historyk spadziajecca, što jany zmohuć upryhožyć ekspazicyju Kupałaŭskaha muzieja, dzie jon pracuje, — u muzieja jość licenzija na zachavańnie kaštoŭnych materyjałaŭ.
Archieołah Siarhiej Dziarnovič tłumačyć, što z punktu hledžańnia navukoŭcaŭ heta zvyčajnaja znachodka. Siemji tady niaredka nazapašvali zołata na čorny dzień. Na hetym ža miescy traplajucca i frahmienty kieramiki XVII stahoddzia, što dla śpiecyjalistaŭ ujaŭlaje bolšuju kaštoŭnaść. Paśla Druhoj suśvietnaj vajny, kali ŭ parku pravodzili rekanstrukcyju, hrunt padvoziŭsia ź inšych miescaŭ i atrymaŭsia pieramiašanym. Tamu ŭ ziamli sustrakajucca absalutna roznyja artefakty.
