Košt navučańnia ŭ BDU budzie «skarekciravany ŭ suviazi z uzrosłymi vydatkami na apłatu pracy, kamunalnymi i inšymi vydatkami», raspaviali ŭ pres-słužbie VNU. Ź jakoj daty i na kolki adsotkaŭ čakajecca pavyšeńnie — pakul nieviadoma. U pres-słužbie ŭdakładnili, što heta adbudziecca «ŭ najbližejšy čas». Hod tamu płata za dva siemiestry vyrasła na 400-500 rubloŭ.

Pavyšeńnie koštu z 1 krasavika 2021 hoda płanujecca ŭ Biełaruskim dziaržaŭnym piedahahičnym univiersitecie — na 5 pracentaŭ.

— Dapłata da kanca navučalnaha hoda (za krasavik, travień, červień) na dzionnym adździaleńni ŭ zaležnaści ad śpiecyjalnaściaŭ u siarednim składzie ad 23 da 46 rubloŭ, na zavočnym — ad 12 da 23 rubloŭ. Pavyšeńnie koštu navučańnia źviazanaje z tym, što z 1 studzienia 2021 hoda pavialičanaja bazavaja staŭka sa 185 da 195 rubloŭ (na 5,4%) i minimalnaja zarabotnaja płata z 375 da 400 rubloŭ (na 6,7%), — padrabiazna patłumačyli ŭ pres-słužbie ŭniviersiteta.

U siarednim ža košty pavysiacca na 100-150 rubloŭ, vynikaje z dakumienta, jaki apublikavany na telehram-kanale «Adličana».

Da prykładu, u pačatku 2020-2021 navučalnaha hoda pieršakurśniki śpiecyjalnaściaŭ z vyvučeńniem zamiežnaj movy płacili 2932 rubli, ciapier hod navučańnia dla ich budzie kaštavać 3078 rubloŭ. Rost — 146 rubloŭ.

Studenty pieršaha kursa śpiecyjalnaści «Muzyčnaje mastactva, rytmika i chareahrafija» ŭ pačatku hoda płacili 3080 rubloŭ, z 1 krasavika košt dla ich vyras da 3234 rubloŭ. Roźnica składzie 154 rubli.

15 sakavika rašeńnie padniać košt navučańnia pryniali i ŭ Homielskim dziaržaŭnym univiersitecie imia Francyska Skaryny. Infarmacyja pra heta źjaviłasia na aficyjnym sajcie vnu. Z 1 krasavika 2021 hod navučańnia dla pieršakurśnikaŭ budzie kaštavać krychu bolš za 2980 rubloŭ. U paraŭnańni ź vieraśniem 2020-ha košt vyras na 139 rubloŭ (prykładna na 5 adsotkaŭ).

Padaražeje navučańnie i ŭ Biełaruskim nacyjanalnym techničnym univiersitecie. Hetuju infarmacyju paćvierdzili ŭ rektaracie VNU. Kali vyraście košt i na kolki — paźniej hetaja infarmacyja źjavicca na sajcie BNTU.

Apošni raz košt navučańnia ŭ biełaruskich VNU pavyšaŭsia hod tamu — u lutym-sakaviku 2020-ha. Navučańnie ŭ BDU tady padaražeła ŭ siarednim na 12 adsotkaŭ (prykładna na 400-500 rubloŭ za hod). Płacić bolš stali i studenty inšych VNU, naprykład, BNU, BDEU i Bresckaha dziaržuniviersiteta. Tady košty dla ich padniali na 5-12 adsotkaŭ.

Клас
Панылы сорам
Ха-ха
Ого
Сумна
Абуральна