«Asobnyja niepradumanyja zajavy amierykanskich kiraŭnikoŭ staviać pad pahrozu abvału i biez taho zališnie kanfrantacyjnyja adnosiny», — adznačyli ŭ dypmisii.
Učora prezident ZŠA Džozief Bajden adkazaŭ śćviardžalna na pytańnie, ci ličyć jon Pucina zabojcam.
Mižnarodnaja reputacyja Uładzimira Pucina mocna paciarpieła paśla 2014 hoda, kali Rasija dałučyła Krym, a rasijskija siły zaniali taksama častku Danbasa. Za apošni hod vyjšli na javu taksama sproba atručvańnia antykarupcyjnaha błohiera Alaksieja Navalnaha i šerah zabojstvaŭ abo zamachaŭ na zabojstvy ŭ roznych krainach śvietu, jakija prypisvajuć rasijskim ahientam. Akramia taho, stali vidavočnyja dziejańni Maskvy pa padtrymcy ultrapravych i ultralevych sił u roznych krainach.
U vyniku ŭsiaho hetaha adnosiny krain šyroka zrazumiełaha Zachadu (ZŠA, Kanada, try dziasiatki krain Jeŭropy, Japonija, Paŭdniovaja Kareja, Aŭstralija, Novaja Ziełandyja i inšyja ich sajuźniki) i Rasii mocna pahoršali, pačałasia novaja honka ŭzbrajeńniaŭ.
Adklikańnie rasijskaha pasła z ZŠA — biesprecedentnaja padzieja, navat padčas Karybskaha kryzisu takoha nie zdarałasia.
«Takoha rodu zajavy nieprymalnyja ni pry jakich abstavinach i niepaźbiežna rezka abvastrajuć našy dvuchbakovyja adnosiny. Adklikańnie rasijskaha pasła z Vašynhtona ŭ Maskvu na kansultacyi — apieratyŭnaja, adekvatnaja i adzina słušnaja reakcyja ŭ takoj situacyi. Padazraju, nie apošniaja, kali nie budzie tłumačeńniaŭ i vybačeńniaŭ z amierykanskaha boku», — napisaŭ na svajoj staroncy ŭ fejsbuku vice-śpikier Savieta Fiederacyi RF Kanstancin Kasačoŭ.
